E fuente Hulandes Follow The Money a divulga cu e sistema di Magister, unda mayornan por sigui e desaroyo di alumno riba scol, tin problema cu privacidad. Hasta servicio secreto di Merca por wak den e sistema.
Na Aruba tambe tin scol cu ta uza e sistema Magister. Entre otro na Colegio Arubano. E scol ta uza e sistema aki pa rooster y otro informacion importante cu mester comunica cu mayornan y alumnonan. Pero tambe por mira e cifranan y ausencia cu motibonan di cada alumno individual. Cada alumno tin su profile y mayornan ta haya acceso na dje.
Sinembargo e fuente investigativo awor ta mustra cu e compania tras di e sistema tin acceso na data di cien miles di studiantenan. E compania yama Iddink Groep ta percura pa ora di cera contracto cu scolnan cu lo firma tambe un convenio pa proteha privacidad. Pero den e convenio aki no a pone cu por uza e dato aki si pa metanan di mercadeo.
E trafico di e data ta bay via e compania Mericano Akamai. Y asina esaki ta cay bou ley Mericano. Cual ta nifica cu departamentonan Mericano di informacion y tambe servicio secreto tin permiso pa tap e trafico di data.
Na Hulanda/Europa e ley di privacidad cu ta conta eybanda, mester proteha e privacidad di studiantenan. Sinembargo e fuente ta conclui cu no tin suficiente capacidad pa aplica e ley. Pues asina e fuente Follow The Money ta conclui:
“ E resultado final: studiantenan ta pega den e prizon di mayornan cu kier wak tur cos, companianan cu kier gana placa cu nan informacion priva, scolnan cu no ta investiga unda tur e data ta bayendo y un gobierno cu ta bin cu regla pero no ta pone fondo disponibel pa asina por aplica e ley.”
