ORANJESTAD – E sistema actual di kima sludge na Parkietenbos ta cumpli cu normanan di USEPA y USDA.
E compania Johnson’s Enterprises kier informa e comunidad di Aruba y muy particular e habitantenan di Parkeitenbos, cu nos sistema di kima sludge y palet riba Serlimar Parkietenbos Landfill ta cumpli cu regulacionnan Mericano di emision.
Nos a bin tuma nota recientemente via medionan di comunicacion cu a bisa, cu e sistema cu Johnson’s Enterprises tin riba tereno di Parkietenbos cu ta destina pa kima e “sludge”, lo ta haci dañonan na nos medio ambiente y ta saca hopi polucion y cu esaki ta dañino pa nos pueblo. E sistema di Air-burners cu ta uza e tecnologia di Air curtain ta cumpli cu e regulacionnan di USEPA y USDA. Nos compania ta haciendo e trabou nan aki pa mas di 7 aña caba bou supervision y aprobacion di DOW, Serlimar y DNM.
E sistema ta wordo considera como uno “ Carbon Neutral ” y e gasnan cu ta sali for di e sistema ta “ BioGenetic ”. E operacion di Johnson’s Enterprises ta pa deshaci di e “Sewage-sludge” cu ta wordo yama “Cake”, cu ta wordo produci na e planta di purificacion na Parkietenbos y tambe di e paletnan cu ta subi riba e dump di Parkietenbos pa cual ta reduci e volumen mas cu 90%. Nos kier pone enfasis cu Johnson’s Enterprises no ta responsabel pa “medical- waste” of kimamento di otro materialnan no organico manera tire etc., esey ta na encargo di Serlimar.
Airburners LCC cu ta e fabricante di e sistema aki ta forma parti di Crada. Crada ta un acuerdo cooperativo unda universidadnan ta haci estudio y a test e mashinnan intensivamente pa asina por mehora e sistema mas ainda conforme e leynan vigente.
