Den programa informativo ‘Aruba Fuerte y Resiliente, Reactivando nos Economia’ a wordo treci dilanti informacion tocante Proyecto Sustainable Island Solution for Science, Technology, Engineering and Mathematics SISSTEM.

Minister di Finanzas, Asuntonan Economico y Cultura, Xiomara Maduro a splica cu esaki ta un programa di educacion pa e pais den cual e ta hunga un rol como minister di Economia, cu tin di haci cu Aruba, cu ta miembro di Landen en Gebieden Overzee (LGO), loke ta e relacion cu Union Europeo y cada 5 of 6 aña ta bin un fondo disponibel pa desaroyo economico pa e paisnan.

Den cuadro aki, Aruba ta haya 8 miyon florin pa proyecto di desaroyo economico, e biaha aki ta trata di SISSTEM cu ta un proyecto di ciencia, educacion, tecnologia, matematica, entre otro area na unda nan a haya e oportunidad pa firma pa 13 miyon euro pa asina por haci e facultad aki na Aruba posibel.

SISSTEM ta para pa Sustainable Island Solution for Science, Technology, Engineering and Mathematics, minister Maduro a expresa cu esaki ta importante pa motibo cu pa hopi biaha no tin estudionan na Aruba di e area aki y aworaki e ta disponibel riba nivel di master y nivel di bachelor tambe.

SISSTEM lo bira un facultad nobo na Universidad di Aruba cu nan lo haci conhuntamente cu Universidad di Leuven na Belgica, e lo dirigi su mes cu un programa di bachelor riba e areanan menciona, na banda di dje tambe ta bin un centro di desaroyo y experticio pa bay mas ariba di loke ta trata investigacion riba e parti di desaroyo sostenibel.

E parti importante di esaki ta segun minister Maduro a señala ta cu tin un monumento envolvi, pa motibo cu caminda cu e facultad aki ta bay ta na Maria Convent, un monumento na unda cu Nacionnan Uni lo bay drecha y transforma pa asina ey e facultad aki por funciona y cu tambe ta bay tin un facultad di masters na unda henter e facultad lo dirigi su mes riba desaroyo sostenibel.

Pa e motibo aki nan ta haya e fondonan pa asina tin desaroyo economico na Aruba y tambe ta bira pa un di e sector cu ta priminti pa diversifica Aruba su economia, e cual e economia su conocemento.

Pa loke ta trata di esunnan cu ta tras di e proyecto aki, minister Maduro a menciona cu nan a forma un comite hunto cu Universidad di Aruba, Universidad di Leuven cu ta zorg pa e curriculum, banda di esey tambe tin Nacionnan Uni, Directie Economische Zaken, Handel en Industrie (DEZHI) y como tambe ta trata di un monumento ademas di esey ta envolvi Monumenten Bureau cu ta encarga di e proyecto.

“Tin basta hende envolvi pasobra esaki ta bay ta un proyecto hopi bunita pa Aruba” minister Maduro a afirma.

Loke SISSTEM ta nifica pa economia di Aruba ta cu nan a bin cu e programa Aruba su economia fuerte y resiliente y eynan tin seis sector cu segun el a sigura, nan ta prometedor pa e diversificacion di economia di pais Aruba y den esaki un facultad manera SISSTEM na unda por medio di investigacion por wak con paisnan chikito manera Aruba por sostene nan mes riba e mundo aki y con e desaroyo ta crece.

Ta existi 17 meta di desaroyo sostenibel SDG’s y eynan lo bin cu investigacion y “un centro asina lo atrae mas hende for di e region y eynan rond di esey bo ta crea un economia”, el a sostene.

Di parti di Universidad di Aruba, Eric Mijts miembro di comite di SISSTEM a expresa cu nan lo tin e programa di bachelor, bachelor of Sciences y master of Sciences, di e programa di bachelor el a splica cu tin tres specialisacion, un di nan ta Data Sciences and Information Sciences, di dos ta Enviroment Sciences y di tres ta Engineering. Tur tres tin enfoke riba loke ta trata desaroyo sostenibel na Aruba.

Di e proyectonan di investigacion den cual SISSTEM ta envolvi, Mijts a declara cu nan ta envolvi den proyectonan di diferente nivel, por ehemplo, riba doctorado manera un investigacion riba agricultura sostenibel, un otro riba Citizens Sciences y otro cu desperdicionan of sushi.

Tambe el a trece dilanti cu nan ta envolvi den proyectonan di investigacion internacional como Global Resilient Reseach Network y hunto cu e coleganan di Universidad di Leuven, tin 26 colega di e universidad aki manera Mijts a bisa cu ta envolvi den un proyecto masha amplio.

Asina mes, el a señala cu lo cual ta interesante ta cu un di nan studiantenan a haya un premio algun dianan pasa cu su proyecto di aviacion sostenibel y esey ta un ilustracion cu nan tin un proyecto den cual por contribui na desaroyo sostenibel di Aruba.

A wordo destaca cu SISSTEM por contribui na economia di Aruba mediante diferente manera, segun Mijts ta kere, pa motibo cu prome ta e desaroyo di un grupo cu conocemento y critico riba desaroyo sostenibel “y esey ta hopi importante, cu nos ta bay for di un perspectiva di Aruba manera un isla vulnerabel pa un isla resiliente”.

Ademas, e desaroyo di e grupo grandi mes e ta un contribucion pa Economia mes pero tambe studiantenan ta haya instruccion riba nan mesun empresa of iniciativa innovativo cu por contribui na diferente manera pa economia como por ehemplo, sostenibilidad di casnan, construccion, tambe den companianan como WEB, Elmar, tur esey ta parti di e proyecto SISSTEM.

Raul Gei director interino di oficina di Monumento a trece dilanti cu nan ta forma parti di e proyecto aki pa motibo cu Maria Convent ta un monumento proteha pa ley, e tambe ta inscribi na oficina di registro na Kadaster.

El a conta un tiki di historia di Maria Convent na unda cu na aña 1920 aproximadamente e convento a wordo traha, loke ta nifica cu e edificio aki tin un balor hopi importante tanto arkitectonicamente como historicamente y pa e motibo ey nan ta pone tur enfasis riba e proyecto aki na unda cu Universidad di Aruba lo bay haci un bon uso di dje.