(EFE) – Sociedad Interamericano di Prensa (SIP) dialuna ultimo a condena e asesinato na Colombia di e periodistanan Dilia Contreras y Leiner Montero, na mesun momento a pidi autoridadnan pa investiga profundamente y haya e personanan responsabel di e dobel homicidio aki.
E organisacion cu sede na Miami (Florida), tambe a bati alarma pa e nivel di violencia halto cu ta bin registrando e aña aki contra periodistanan na America di Sur.
E reporteronan Dilian Contreras y Leiner Montero tabata biaha den un auto na un caretera di municipio di Fundacion, na departamento di Magdalena, ora nan a wordo ataca cu tironan for di un brommer e dia 28 di augustus den oranan di marduga, segun medionan local a indica.
Un otro persona cu tabata biaha cu e periodistanan a resulta herida, aworaki ta stabiel.
Di acuerdo cu testimonionan, ambos tabata cubri e fiestanan patronal di Santa Rosa di Lima, zona rural di Fundacion, na unda a registra un discusion entre varios persona den cual Montero tabata involucra.
E periodista Contreras di 39 aña, tabata director di e programa digital La Bocina Col, mientras cu Montero di 38 aña, tabata director di radio comunitario Sol Digital Stereo.
Jorge Canahuati, presidente di SIP a destaca cu “aunke ainda e motibo di e asesinatonan no ta conoci”, autoridadnan no mester descarta e trabao periodistico den nan liñanan di investigacion. Canahuati, consehero delegado di grupo Opsa, di Honduras, tambe a expresa su solidaridad cu famianan y coleganan di e periodistanan asesina.
Di su parti, Carlos Jornet, presidente di Comision di Libertad di Prensa y Informacion di SIP a expresa su preocupacion pa e nivel di violencia contra periodistanan cu a aumenta e aña aki na Latino America.
Jornet, director periodistico di Voz Interior, di Argentina, a detaya cu di acuerdo cu registronan di SIP e cifra di periodistanan asesina na 2022 a yega na 30: 18 na Mexico, 3 na Haiti, 2 na Ecuador y Honduras, 1 na Brazil, Guatemala y Chile, ademas di e 2 homicidio registra na Colombia.
