Pero economia a crece pa paga e cos aki?
Den un rueda di prensa un poco sorpresivo, gobierno a etala tur e beneficionan di fin di aña cu nan tin pa nos. Prome Ministro Eman mes a trece e bon noticia, cu a laga e anuncio di cambio di orario di Aruparking di algun dia pasa mustra chikito. Nos ta bay haya rebaho di 15% di tarifa di coriente, comercio tambe ta haya pero menos: 5%. Pregunta: nos no por a hay’e prome? Of esaki ta djis pa kita atencion di e crimen di e hedging cu a costa centenares di miyon?
Serlimar ta bira dies florin na luga di binticinco, pa esunnan cu cartera chikito. Despues Prome Ministro mes a causa confusion bisando cu si nos tur paga esey (10 florin) anto nos ta haci Serlimar hopi feliz. Pero, no ta asina cu Serlimar ta core den cora pasobra masha hopi hende no ta paga e Afl. 25? No ta gobierno ta subsidia e empresa aki keto bay? Kiermen gobierno ta djis subsidia un tiki mas, sin cu nos sa of kier sa, y cla! Nan por? Ban wak, pero tin aspecto mas dificil na e asunto aki.
Por ehemplo: 2 porciento di aumento di salario minimo. Nos a pensa cu e ley di salario minimo ta basa riba crecemento economico y riba inflacion; crecemento pa hacie posibel y inflacion pa hacie necesario. Anto nos no tin ningun di dos ! Banco Central ta categorico den su opinion tocante rumbo cu economia a tuma e aña aki. Ta bunita cu tur hende ta referi na e crecemento ‘modera’ di 0,4% cu supuestamente nos tin e aña aki. Pero esey ta e crecemento di GDP real. Ora nos ta papia florin, e aña aki nos ta cay bek den nos GDP nominal 1,5%! Pa nos suerte esaki ta cay hunto cu un deflacion cu ta camufla nos tendencia negativo pa yega na e 0,4% ey.
Interesante pa sa kico Sociaal Economische Raad (SER) ta bay conseha riba esaki. Nos tin caba un economia den ambiente negativo cu lo no bira mas alegre di 2% mas di crecemento di payroll. E por bira un ‘turning point’ tambe, unda ta paga salario aumenta di un banda, pero di otro banda ta cuminsa kita hende for di trabao. Anto kico nos a gana?
Pero pa gobierno henter e asunto aki ta masha simpel: nan ta pushando dos cos pareu. Nan ta bin awor cu un ‘kerstpakket’ pa e gruponan menos beneficia pero mas numeroso. Na oposicion e tarea awor pa contesta. Y tur cos cu nan bisa ta cay malo. Si nan critica Mike Eman pasobra e ta gasta di mas, nan ta haya tur e beneficiadonan contra nan. Si nan bay di acuerdo nan a perde sinembargo pasobra no ta nan ta parti regalo. Esun den gobierno cu por parti cos semper tin un bentaha.
Pero ta parce cu tin mas motibo pa bin cu e ‘move’ sorpresivo aki. Y esey ta e guera cu Hulanda. Awor gobierno tin tres instancia cu ta bisa cu nan presupuesto no ta bon: Contraloria General, Conseho Consultativo y CAFT. Regalando un pakete di regalo di Pasco hopi generoso, ta preparando e escenario pa loke ta bay pasa dentro di poco. Ta p’esey no por warda mas pa bin cu e noticia aki. Dentro di poco presupuesto ta cla y ta keda aproba, Gobernador ta firma, anto despues… gobierno kier bay guera bon prepara y cu mas tanto hende nan tras. Pasobra CAFT ta haya e documento y mester duna su evaluacion. Manera cos ta awor, practicamente sigur lo tin un opinion negativo cu, si gobierno di Reino bay di acuerdo, ta desemboca den un ‘anwijzing’ pa cambia presupuesto. Eynan welga di hamber no ta yuda, biaha pasa tampoco, by the way.
Y cu e experiencia di ultimo lunanan den mente, no ta parce cu na Hulanda tin un ambiente asina positivo pa e gobierno aki, y pa ningun gobierno di e islanan. Na Hulanda niun hende kier duna PVV y Wilders oportunidad pa core pasa nan, y un di e maneranan ta pa ta ‘tough’ cu e gobiernonan di e islanan. Esey ta loke Mike Eman a experimenta caba den e asunto di nombramento di gobernador. Hasta awor a sali e noticia cu e famoso declaracion conhunto tabata acorda caba prome cu el a biaha, sino e no lo a haya cita cu Plasterk. Nos tabatin e impresion cu e carta tabata cla cerca Plasterk, ya cu e poco minuutnan cu nan a keda paden, no tabata suficiente pa traha un carta conhuntamente. Si awor ta resulta cu ta pio y cu e tabata sa caba cu ta payaso e ta bay haci, nice, pero e no ta cambia nada na e ‘wake up call’ di kita sombre cu el a haya na Den Haag. Y e episodio di presupuesto aki por bira mas duro ainda.
Pero, pa bolbe na e situacion politico aki mes, mester constata cu esaki ta practicamente un maniobra magnifico cu lo tin su contrincantenan local kibrando nan cabes ta con ta bay contesta esaki.
