Diadomingo ultimo, un gran cantidad di mucha compaña pa nan adultonan a bin na waf di Aruba Ports Authority pa duna un caluroso bon bini na Sinterklaas y su Pietnan cu a yega Aruba pa nan celebracion.
Manera gobierno di Aruba a informa, despues di baha for di e barco y saluda tur mucha presente, Sinterklaas y su 85 Piet a bay den un parada na unda a organisa diferente show y actividad pa tur mucha. E parada tabata uno cu hopi ambiente, y a wordo anima pa Tanchi Esmee. Dilanti tabata tin Massive Brassband pa inicia un di e temporadanan mas dushi pa nos muchanan.
Prome Minister Evelyn Wever-Croes tabata para dilanti bestuurskantoor, pa asina por a presencia e bunita parada, y na unda e tabata tin e oportunidad di comparti e dia special aki cu tur e muchanan para eybanda. Prome Minister a expresa cu e bunita tradicion aki semper a wordo celebra den grandi, y por nota esaki, mirando e cantidad di hende cu tabata ansiosamente para na banda pa por duna Sinterklaas y su Pietnan un bon bini.
Ta gradici Departamento di Cultura, Aruba Ports Authority, DOW, Polis, y Crisis Management Office pa a organisa un actividad asina exitoso pa e muchanan.
