Ayera tardi, un momento hopi spera pa muchanan chikito na Aruba a bira realidad. Riba un boto hunto su Pietnan cargando saconan enorme yen di mangel, Sinterklaas a yega Aruba via e Gate principal di Toren di APA pa alrededor di 4or di atardi.
E muchanan a mustra emocion y alegria di mira Sinterklaas yega, dunando asina inicio na e temporada di fin di aña, y alabes sigurando cu tur bon mucha lo ricibi nan regalo dentro di poco.
Cu tur mucha gritando “nos kier mangel!”, e Pietnan a pasa door di e multitud partiendo e mangelnan tradicional di e temporada, treciendo un toke di dulsura pa e muchanan.
Den un discurso breve na su yegada, Sinterklaas a bisa:
“Bon tardi muchanan, con ta bay? Mi ta hopi contento di ta na Aruba un biaha mas. Mi ta spera tur e muchanan ta sigui haci bon mucha.” Asina e lo por pasa parti regalito na e bon muchanan. “Masha masha danki pa e ricibimento di Sinterklaas y tur e Pietnan,” el a finalisa bisando.
Finalmente, Sinterklaas a subi un auto lidera pa un Mercedes Benz cu plachi number “Sint”, y sigui pa su Pietnan na pia, a dirigi na Renaissance Marketplace, unda a duna Sinterklaas un bon bini caluroso cu baile, canto y sigur hopi ambiente!
