Miembronan di parlamento lo tin cu warda poco mas largo pa discuti e pakete di estimulo y alivio pa Sint Maarten (SSRP) y e condicionnan di e apoyo financiero di Hulanda. Parlamento a pospone e sesion urgente aki te proximo aviso pasobra e lidernan di sindicatonan y nan miembronan a yega dilanti parlamento na comienso di e reunion pa demanda papia cu parlamentarionan.
A cancela e meeting riba peticion di presidente di parlamento Rolando Brison. Lidernan y miembronan di Windward Islands Chamber of Labor Unions (WICLU), Windward Islands Civil Servants Union/Private Sector Union (WICSU/PSU), ABVO Sint Maarten, Windward Islands Federation of Labour (WIFOL), Windward Islands Teacher Union (WITU) y Committee of Civil Servants Unions (CCSU) tur a presenta dilanti parlamento cu señanan banda di 12 or di merdia pa demanda pa papia cu parlamentarionan.
Brison, hunto cu miembro di parlamento Melissa Gumbs di e partido pa progreso (Party for Progress), Claudius Buncamper di United Sint Maarten Party, Angelique Romou di National Alliance tur tabata para na e caya pafo di e entrada di parlamento mientras e lidernan sindical tabata expresa nan descontento. Por a tende nan ta sclama “ta basta caba”.
