Forsa policial di St. Maarten KPSM a actua rapidamente despues cu a nota un post riba Facebook dialuna ofreciendo residentenan placa pa asesina miembronan di forsa policial. Polis a listra e cas di famia V. riba Defiance Road dialuna 4pm.
Segun Vocero di Polis, Chief Inspector Ricardo Henson, e buskeda a wordo haci a base di un menasa manda publicamente riba rednan social, den cual e sospechoso, miembro di famia V identifica como D.V. ta reclutando miembronan di comunidad pa uni forma un team pa elimina forsa policial di St. Maarten. E recompensa pa participa den e team aki lo ta un suma di $70,000.
“Inmediatamente despues cu Polis tabata na altura di e menasa, e Team di Aresto y otro oficialnan di investigacion a keda mobilisa y a bay cas di e sospechoso. E menasa aki riba bida di e miembronan di henter forsa policial ta tuma hopi na serio.
KPSM y su miembronan nunca lo hala atras for di nada y lo bay aresta tur y cualkier involucra den e menasa aki. Si KPSM hala atras, e momento ey comunidad di St. Maarten, cu ta depende riba KPSM pa siguridad y proteccion, nunca lo ta sigur. Esey ta inaceptabel, y un menasa tambe pa nos sociedad.
E sospechoso no tabata na cas ora e oficialnan a yega. Un buskeda di e cas a sigui den cual varios aparato electronico a keda confisca pa mas investigacion. No a aresta e sospechoso ainda. Mientras tanto, KPSM a haya sa cu e recompensa a hisa te na $100,000”, Henson a bisa.
KPSM ta adverti cu cualkier persona cu participa den cualkier aspecto di efectua e menasa aki lo keda aresta y lo mester pasa proceso legal. KPSM a bisa den su declaracion cu Polis no lo stop di busca e sospechoso, y cualkier persona involucra, te ora nan ta aresta y bou custodia.
