Miembro di parlamento den oposicion Egbert Doran (National Alliance) a declara cu prome minister Leona Romeo-Marlin a menas’e net prome cu e tratamento di e presupuesto pa 2019. Doran a bisa di lo entrega keho na polis.

Prome minister Romeo-Marlin a nenga cu e lo a menasa Doran di cualkier forma, pero e mandatario a declara cu e ta tumando su acusacion na serio. Romero-Marlin a bisa The Daily Herald diabierna anochi cu e no a acerca e parlamentario den cualkier manera menasante, bisando cu e lo ta prepara pa defende su mes en caso cu e parlamentario dicidi di tuma accion.

Comentando riba e combersacion cu tabatin entre su persona y Doran den sala di parlamento, e prome mandatario a bisa cu el a pidi e parlamentario pa pone su bida den peliger por medio di laga comentarionan relaciona na su persona riba radio.

“Lo unico cu mi por bisa ta cu e parlamentario tin un vendetta personal contra mi pa via cu mi ta carga mi responsabilidad como minister di asuntonan general den un manera cu ta envolve su mama’, Romeo-Marlin a declara.

Doran su mama ta ex minister plenipotenciario Henriette Doran-York. Segun Romeo-Marlin, nan a entrega un keho na su ministerio relaciona cu cierto accionnan cu e ex minister plenipotenciario a tuma mientras e tabata na Hulanda. ‘Mi no por ignora ningun keho’, e prome minister a bisa.

Doran durante un sesion parlamentario a uza su tempo pa duna un ‘notificacion’ na pueblo di Sint Maarten, acusando e prome minister di tin mal manera ora di papia cu su persona den parlamento, ‘cual ta e cas di pueblo’.

El a bisa dilanti testigonan cu e prome minister a menas’e por medio di bisa ‘sigui papia y bo lo wak’.

Doran a sigui bisa: “Ami no sa kico esey kier men, pero mi lo sigui papia pasobra ‘parley’ ta e palabra Frances pa papia y nos ta den parlamento, pues mi lo sigui papia pa representa pueblo di Sint Maarten. Mi no ta bay laga nada stop mi y bo no por mantene un bon homber abou.”

Cabando su discurso, Doran a duna su propio warning na e prome minister: “Haci bo trabou y stop di bende bo pais. Esey ta mi opinion y con mi ta sinti. Y mi lo sigui representa pueblo di Sint Maarten, cual lo ta bon pa abo tambe haci.”

Prome minister Romeo-Marlin ta cada biaha bou mas critica di parlamentarionan di ambos banda, cual ta haya cu su posicion ta mucho pro Hulanda. Nan ta mir’e como mucho cla pa bay di acuerdo cu e exigencianan di gobierno Hulandes a cambio di e fondonan necesario pa recupera di e calamidad cu horcannan Irma y Maria a laga atras den september 2017.