Diadomingo ultimo Polis, Warda Costa, Rescate Marino y Gendarmes di e banda Frances a combina forsa pa asina yuda den buskeda di e dos menornan cu a disparce despues di un fiesta diasabra anochi ultimo.
Segun Polis , Gendarmes di e banda Frances di e isla a ricibi un yamada pa mas o menos 3or di marduga tocante dos menor cu no a regresa nan cas. Mas despues nan a descubri cu e muchanan a bay cu un jet ski na banda Frances di e isla y tabata manehando esaki den lagun. Gendarmes a cuminsa un buskeda den lagun, pero no a haya e menornan, ni e jet ski.
E buskeda a bira mas grandi caminda cu tanto Polis, Warda Costa y Rescate Marino di e banda Hulandes di e isla cu a uni na e buskeda. Gendarmes tambe a solicita asistencia di un ekipo di buskeda di helicopter for di Guadeloupe.
Durante oranan di mainta e forsanan combina a haya e dos curpanan den lagun Frances di Sint Maarten y e jet ski daña a ser haya den awanan cerca di e banda Hulandes di e isla. E jet ski a ser transporta pa e substacion di warda costa pa mas investigacion.
