“Mi ta spera cu e proyecto aki, lo ta un inspiracion pa otro scolnan crea nan mesun “tech-room”.
Diahuebs mainta, Prome Minister Evelyn Wever-Croes acompaña pa representantenan di Futura, a bishita Sint Dominicus College, cu ta e scol ganador di e proyecto di Edutech pa ciclo 4. Cu e proyecto inscribi, e scol a logra gana un total di 15 Ipads y 6 chrome books, cu awe a wordo poni den un klas cu nan a yama nan “tech-room”. Prome Minister tabata tin e honor di a efectua e apertura oficial di e “tech-room” aki, cu ta un klas hopi bunita y interesante.
Durante su bishita, Prome Minister a haya un presentacion di e alumnonan di tur loke nan por haci caba, mirando cu ya ta añas cu Sint Dominicus College a cuminsa cu digitalisacion na scol. E alumnonan ya caba ta hopi experencia riba varios di e terenonan di innovacion manera coding, y traha wega, cu ta duna nan un miho bista pa loke ta programacion, y ta yuda nan den diferente materia, manera matematica y wiskunde.
Prome Minister ta felicita Cabesante di scol señora Caroline Cardose, y Meneer Mario Lobo cu ta e “waarnemend hoofd, tur alumno y docente, cu e bunita proyecto aki, y ta deseanan hopi exito cu e materialnan nobo. Tambe, Prome Minister a expresa di ta spera cu e proyecto aki, lo ta un inspiracion pa otro scolnan crea nan mesun “tech-room”.
Na su turno, Cabesante di scol señora Caroline Cardose a gradici Gobierno di Aruba, y Futura pa kere den e scolnan, y bin cu e proyecto importante aki, cu ta yuda e scolnan avansa riba e tereno di innovacion. Tambe, sr Mario Lobo ” a expresa algun palabra na unda su persona a indica cu e “tech-room” aki tabata un soño di e scol pa hopi tempo caba, y finalmente awor cu e scol a gana e materialnan digital aki, nan soño a bira un realidad.
