Por fin despues di varios aña, Sint Aloysius School su studiantenan, docentenan y trahadonan ta bay haya nan scol anterior back full renoba segun loke minister di Enseñansa Endy Croes a informa ayera mainta den un declaracion na Bon Dia Aruba.
“Hopi biaha ora tin construccion tur cos ta den man di gobierno y hopi biaha material por a yega laat pero lo cual a tuma luga tambe nos sa cu ta falta e fase final cu ta e ponemento di asfalt cu DOW a priminti nos cu e siman aki esey lo cuminsa tuma luga y un bes esey ta cla ta falta algun detaye como desague y tambe a aloca un gymzaal cu no tabata existi, SKOA a manda nos un carta cu e siman di 20 pa 28 di september nan kier muda, pues como gobierno responsabel nos a alarga e huur na e otro edificio cu tabata cancela caba pasobra nos a kere cu nos por a logra den augustus, pero si tur cos lo cana bon e siman di 20 pa 28 di september e mudamento lo tuma luga y manera vakantie di october lo caba, Sint Aloysius ta bay den nan scol nobo ful renoba,” minister Croes a señala.
Tabata na juni di aña 2021 ora miembronan di Sint Aloysius a tene un conferencia di prensa pa exigi clarificacion tocante situacion di nan scol ya cu varios aña caba nan a muda na un edificio na L.G Smith Boulevard y nan localidad mes tabatin basta daño di infrastructura, a ser vandalisa manera su cabesante Vladimir de Cuba a confirma e tempo ey.
Asina mes, el a sigura cu scol aki nunca tabatin airco y tabatin temporada cu e calor den e klasnan tabata insoportabel pa e muchanan y personal, loke no ta nada agradabel pa duna les den ambiente ey pa motibo cu alumnonan mester siña na un manera optimal y muchanan por ta mas trankil.
Tanto ciudadanonan como docentenan y studiantenan ansiosamente ta warda pa nan scol pronto lo keda cla pa asina nan por bay na e localidad cu ta kedando full renoba y cu a haya contratempo cu no por a cuminsa e aña escolar nobo aki manera a wordo informa riba varios comunicado di prensa di gobierno mes.
Minister Croes a informa cu manera ta conoci desde aña 2015, scol basico Sint Aloysius School na Noord a bin ta haciendo varios peticion pa renoba e edificio di e scol, mirando e estado critico cu e edificio tabata aden. Esaki naturalmente no tabata un ambiente sigur pa e alumnonan haya les. Den pasado diferente departamento di gobierno y instancia a bishita e scol y por mira cu e edificio no tabata adecua pa siguridad di e mucha- y maestronan, pero asina mes no tabatin ningun accion riba e situacion aki.
