Sindicatonan uni ta vocifera: Tin cu zorg pa prestatiemanagement bay den un manera responsabel y realistico

Ayera mainta varios sindicato di e isla a uni den un conferencia di prensa pa asina papia tocante e decision di gobierno di introduci un ‘Prestatiemanagement-systeem’. Nan a sigura cu esaki ta hancra den decreto nacional AB2022 number 165, pero mester introduci e sistema di un manera responsabel.

Edward Maduro ken ta fungi como presidente di sindicato di Aduana (Sada) y tabata e vocero di e sindicatonan cu a uni ayera como Sada, Seppa, Simar, SPA, Topa y FTA a expresa cu den e prome conferencia di prensa aki nan kier a trece dilanti dos topico importante pa trahadonan publico y semi-publico.

Primeramente, el a splica cu por tuma nota cu gobierno na final di aña 2022 a pasa un LBham unda cu a bay implementa un ‘prestatiemanagement-systeem’ unda cu for di aña 2021 nan ta bin reuniendo cu gobierno y Departamento di Recurso Humando (DRH) tocante esaki pero sindicatonan ta considera cu e manera kier trece esaki ta algo cu nan como sindicato no por acepta “pasobra e ta bay tin repercusion tanto pa miembro y no miembronan di sindicato”, Maduro a bisa.

Pa e motibo aki, sindicatonan den varios ocasion a pidi gobierno pa wanta un rato e implementacion di esaki pa motibo cu nan ta opina cu “esaki no kiermen cu nos ta contra su implementacion sino cu e ta trece cune cierto cosnan peligroso pa e trahado,” el a sigura.

Den dos carta cu nan a manda na gobierno nan ta haci e peticion pa warda un rato pa motibo cu ya caba e tempo ey e fecha pa introduccion di 1 di januari 2023 pa nan no ta factibel, pa tin algo carga door di tur sindicato y gobierno, “logicamente bo ta bay haya cu no tur hende ta bay para den un consenso 100% pero ora ta trata di trahadonan y miembronan, eynan si nos tin cu para hopi fuerte y pa defende nan posicion huridico.”

Den e puntonan importante di e landsbesluit aki, Maduro a señala cu e parti di ontslag di un ambtenaar den nan concepto a bira mas facil pa gobierno haci uso of “haci mal uso di dje.”

Nan a sinta cu DRH riba e asunto aki manera Maduro a menciona, pero esey no ta nifica cu sindicatonan tabata di acuerdo, cu logicamente ora kier yega na un consenso den un tipo di landsbesluit asina importante y grandi pa futuro loke nan kier haci ta pa trece tur e punto dilanti y trahadonan keda salvaguardia.

Ora landspaket a bin na vigor cu mester bin un prestatiemanagement pa nan como Cuerpo di Aduana y pa Polis, ta algo cu no ta mucho nobo pa nan segun Maduro a declara, pa motibo cu ya caba nan tin un den nan positionele bepaling, pero aworaki a bin otro puntonan cu a wordo introduci den e ley aki cu ta “hopi leu di cas compara cu loke nos tin caba y p’esey ora mi a wak na final di e ley den e parti di Aduana, Polis y Bombero ta wordo ingetrok.”

Tambe, el a señala cu den un rapport cu Deloitte a concipia nan ta duna datonan importante como por ehemplo unda nan ta bisa cu DRH no tin suficiente experticio pa bin cu un sistema asina, nan ta e instancia cu ta trek voor esaki pa gobierno.

Den mesun rapport aki, ta indica cu DRH ta traha bao presion di gobierno manera Maduro a indica y “logicamente na Aruba nos por traduci esey den presion politico, pasobra nos tur sa di experiencia cu hopi bes gobierno, politiconan ta tuma decisionnan cu metanan politico su tras, esey no ta un secreto,” el a bisa.

Ademas, el a declara cu un prestatiemanagement ta habri man pa gobierno haci mal uso di esaki unda cu directornan no ta wordo afecta sino empleadonan chikito so.

Un otro punto cu nan a trece dilanti ta e gratificacion of compensacion pa por haci cu aparato publico bira mas productivo, un incentivo pa haci e trahado mas bon na su pia di trabou, cu e por produci mas y por cumpli cu su deber mas miho ya cu ta existi problematica di infrastructura, mobiliario, entre otro.

“Ta hopi punto mas unda nos ta bisa cu nos ta hopi leu di cas cu e prestatiemanagement aki, nos no ta bisa cu nos ta completamente den contra pero, nos ta bisa cu e mester wordo treci den un manera cu e ta wordo carga pa tur hende, di un manera cu nos miembronan y ambtenaar por ta sigur cu nan por tin un tipo di abuso cu por wordo haci contra nan mal usando e prestatiemanagement.” Maduro a specifica.

Di su parti, Josephine Albertus ken ta fungi como presidente di Sindicato di Maestronan di Aruba (Simar) te otro siman, a señala cu un prestatiemanagement ta pa mehora e dienst pero na momento cu kier cu un mehoracion tin cu zorg pa e bay den un manera responsabel y realistico.

Segun el a splica, den e mesun rapport di Deloitte el a bisa cu ora cu bo bin cu algo adhoc bo no por garantisa cu e lo bay di un manera bon y di un manera realistico, “nos ta ripara cu nan a pasa algo lihe lihe, anto ken ta esun cu ta ser perhudica? Ta e trahado. Ora nos a bin cu nos prome carta nos a mustra nan cu tin 90 dienst, cu b’a bin cu un pilot cu no ta full e aña sino un par di luna den dje bo ta bin cu 38 dienst, unda e otro dienst a keda? Pasobra si bo kier pasa algo cu ta bay perhudica e trahado, tur hende mester ta na haltura no un grupito so y a base di esey bo ta bin y bo ta pasa algo, p’esey nos ta bisa cu no ta nos no ta di acuerdo, sino cu e tin cu bay na un manera realistico,” Albertus a finalisa.