Sindicatonan uni hunto cu organisacion OPPA ta yama reunion urgente cu tur miembro: “No tene miedo pa intimidacion”

Diaranson mainta sindicatonan uni, SIMAR, SADA, SEPPA, SPA hunto cu organisacion OPPA a bini hunto durante un otro conferencia di prensa pa un yamado urgente na tur miembro pa bini forma parti di un reunion na SIMAR di 2or di merdia te cu 4or awe Diahuebs atardi. Esaki ta un reunion convoca pa e sindicatonan pa asina informa tur miembro riba detayes di desaroyonan actual.

Ultimo temponan aki, sindicatonan ta constantemente ocupa cu reunionnan, mandando y respondiendo cartanan y mas. Tin hopi preocupacion pa loke ta e situacion di costo di bida, aumento di awa y coriente y hopi mas cosnan cu ta atacha e miembronan directamente, segun Edward Maduro di sindicato SADA.

“Y nos ta kere cu ta na su luga, y e ora ta oportuno pa yama e miembronan y asina conhuntamente den un reunion conhunto, pa no yama reunion individual di cada sindicato e biaha aki, pero opta di haci e hunto pa duna den detayes e situacion den tur aspectonan cu ta toca ambtenaar y pensionadonan directamente,” segun Sr. Maduro.

Sindicatonan recientemente tabatin reunionnan pa atende cu asunto di aumento den awa y coriente, a topa cu DRH pa loke ta posicion huridico di ambtenaar, e sindicatonan pues ta hopi activo ultimo tempo. Nan ta haci un yamado aworaki pa e reunion aki cu miembronan y ta encurasha miembronan pa yega e reunion, pasobra e ta toca nan directamente. “Si bo lag’e pa otro hende bin conta bo, anto bo no bin mustra bo preocupacion pa bo mesun cartera, ningun otro no lo por haci’e pa bo. E ta bo derecho pa asisti na un reunion.”

Den pasado a indica cu miembronan ta proteha como nan derecho pa bin asisti un reunion di sindicato sin tin ningun consecuencia pa loke ta kitamento di placa den salario. Esaki ta algo cu tambe lo wordo splica den detaye durante e reunion. “Nos tin cu caba cu e sistema unda cada biaha cu sindicatonan ta yama su miembronan pa un reunion, bo ta haya intimidacion ta sali inmediatamente for di oficinanan di gobierno di Cocolishi pa purba spanta hende pa nan yega bay reunion,” Sr. Maduro ta expresa. E ta sigui bisa cu: “Tempo di spanta a caba ‘long ago’ anto ta yega un momento pa bo cuminsa para pa bo derechonan. Nos ta sigura bosonan tambe cu tur esnan cu acudi mañan ta cay bao proteccion cu sindicato ta brinda.”

E sindicatonan ta enfatisa cu si acaso hende bin intimida algun di nan miembronan, cu si nan haya nan mes ta laborando anto ta experiencia algun tipo di intimidacion di parti di hefenan of di parti di gobierno directamente, ta haci peticion pa nan yega e reunion pa asina por wordo splica pakico e cosnan aki ta pa pasado. E sindicatonan ta para duro riba e punto cu no mester tene miedo cu lo bay mishi cu bo cartera, pasobra ta bo derecho pa asisti na e yamada di sindicato pa un reunion. E tema di awa y coriente lo wordo toca, e tema di BTW, tambe entre otro. Lo brinda splicacion riba kico ta e rol cu sindicato tabata hunga tanto dos siman pasa y recientemente den reunion riba tema di awa y coriente.

Maduro: “E tempo di spanta a pasa. Ta yega momento pa para pa bo derecho. Mi ta kere cu hunto nos lo por logra tur locual cu nos tin como meta pa asina salvaguardia nos posicion huridico como trahadornan di pais Aruba.”

Constantemente bo ta haya feedback di miembronan cu ta preocupa cu e situacion manera cu e ta bayendo segun Sr. Maduro, tur dia ta bin algo nobo y bo no ta wak luz na final di e tunnel. E sindicatonan no por contraresta ni bringa nada nan so, nan tambe ta trahado pero na tin un rol como vakbond pa tanto busca informacion y pa informa tur esaki na e miembronan. A opta pa haci e reunion aki hunto pasobra ta mas cu logico despues di añanan toch trahando hunto, pa haci e tipo di reunion aki den e forma aki hunto cu OPPA pa tur hende haya mesun informacion y no tin ningun pregunta pa keda habri.

Finalmente e sindicatonan kier a laga sa na algun miembronan cu kisas no ta di acuerdo cu algun puntonan treci dilanti pa sindicatonan, nan por bin toch y trece nan desacuerdo dilanti y por ta hasta otro opcionnan. Mas cabes ta pensa mas hopi, si bo no ta di acuerdo mes y bo ta mira un otro punto di salida, segun e sindicatonan ta enfatisa esaki ta un bon chens pa bin expresa tur e preocupacionnan aki.

Maduro: “Si bo no ta bin y laga nos sa, e ora nos no lo por sa den ki rumbo pa sigui bay of cu lo tin otro opcion.”