Ayera mainta, sindicatonan SADA, SEPPA, SIMAR, FTA y SPA a duna un contesta na Gobierno di Aruba tocante e ley di Prestatiemanagement, unda cu nan a establece e fecha 30 di maart como plaso maximo pa revoca e ley, maske gobierno ainda kier sigui dialoga cu nan segun prome minister a sigura.
Edward Maduro, presidente di Sindicato di Aduana (SADA) a señala cu na momento cu nan a entrega un manifiesto, diabierna di siman pasa, dia 17 di maart, nan a haya un contesta di prome minister Evelyn Wever-Croes unda cu “el a skirbi par di cos, pero e no a bisa mucho, pasobra e contesta mes cu si ta trek in e ley of no, e no a contesta.”
Igualmente a comenta cu prome minister a manda un concepto di un decreto ministerial unda cu nan ta forma e comision tecnico. Pero despues di esey, e sindicatonan a dicidi pa contesta prome minister diadomingo ultimo, door di manda un carta bisando cu locual el a manda dia 17 di maart no ta cuadra cu locual tabata den e peticion di manifiesto.
Dia 20 di maart, e sindicatonan a haya un otro contesta for di prome minister. “Akinan nos tin cu bay reacciona riba dje y bisa no solamente e ambtenaarnan, esnan cu e prestatiemanagement no ta conta p’e, pero mi kier pa tur hende; pasobra nos a wak cu minister president a bay den otro rueda di prensa dialuna bisando algun cos cu sigur no ta cuadra cu e berdad,” Maduro a comenta.
Den e carta aki ta indica, cu entre otro, prestatiemanagement ta un landspakket verplichting. “Contrario na loke prome minister a bisa ora nan a entrega e manifiesto, cu gobierno tabatin intencion riba un prestatiemanagement pasobra hopi hende a bis’e cu mester bin den un manera uniforme pa evalua e trahado; y p’esey mes nan a dicidi, pero pandemia a dal… niun momento ey el a bisa cu e ta un landspakket verplichting. Pero den su carta di 20 di maart si el a bisa locual ta corecto”. Maduro a bisa.
Nan ta considera cu nan no por bay den un comision tecnico pa motibo cu Gobierno no ta sigura si lo tin algun cambio den ley y si ademas no ta kita e ley for di mesa. “Pasobra si den un aña y algun luna cu nos tabata na mesa cu Gobierno ta discuti e concepto di ley cu nunca nos no a haya pa wak, aworaki, bo ta kere cu e ley aki cu ta firma, Gobierno ta bay haci cambio di 4 pa 6 siman?” Maduro a sigura.
Despues cu e cinco sindicato a reuni ayera, nan a indica cu nan ta bay manda un carta di contesta na prome minister, tambe na parlamento, VNO y secretario di Estado Alexandra van Huffelen bisando cu “tanten cu e ley ta na mesa y ta na vigor, nos no ta bay sinta den un comision tecnico.”
Igualmente Maduro a sigura cu nan ta bay duna Gobierno un otro deadline cu fecha 30 di maart pa nan haya un contesta positivo. Den caso nan no haya e contesta positivo cu ta bay revoca e ley, nan lo tuma nan siguiente paso sin descarta mas accion.
