Gobierno mes no por duna mucho detaye kico ta spera e empleado publico den futuro, pero esey no ta kita afo cu sindicatonan ta para pa derecho di nan miembronan. SADA, SIMAR y SPA a reuni cu Gobierno riba e landspakket y particularmente, e consecuencianan pa e miembronan cu a entrega salario y beneficio ‘tot nader order’ sin cu tin claridad. Esey tabata e meta di e splicacion di e tres sindicatonan y nan presidentenan.

Edward Maduro di SADA, den presencia di Josephine Albertus di SIMAR y Joselino Dirksz di SPA a enfatisa cu empleadonan publico kier claridad di nan posicion y salario, mientras cu un tercera parti di comunidad ta depende di donacion pa come. “Nos tur tin famia afecta. Josephine, Joselino ay ami no t’ey pa vocifera nos pensamento personal. Nos mester papia conforme deseo di nos miembronan.”

Kico pa spera na 2021

Y e miembronan ta empleadonan publico cu a entrega 12.6 porciento di nan salario y beneficio pero kier claridad di Gobierno kico ta spera pa e siguiente aña. “Locual nos ta haci ta ’toets’ (midi) e desbalansa entre Ministernan, Parlamentarionan y Coordinado cu locual nan ta ricibi como toelage, y corda comunidad cu no tur ambtenaar ta gana riba 3000 florin.”

Edward Maduro di SADA a duna un ilustracion di e reunion informativo cu tabatin cu Conseho di Minister siman pasa. Tur sindicato cu ta representa empleadonan publico a acudi na e encuentro, unda a pone enfasis na Gobierno cu unicamente tabat’ey pa haya informacion. “Nos no a duna aprobacion ni pa duna luz berde pa kita algo. E tabata pa busca informacion di Gobierno y e landspakket, pa sa kico e landspakket ta nifica pa nos miembronan.”

Maduro a bisa cu miembronan ta hopi preocupa y tabata kier claridad riba kico ta spera nan. “Ningun momento e reunion tabata pa acorda cu algo.”

Desde nei Gobierno a informa empleadonan publico cu e cortamento den salario y beneficio di 12. 6 porciento ta ‘tot nader order,’ esta te proximo aviso. Pero e tempo ey, no a sinta mes cu sindicatonan pa yega na un acuerdo pa corta den e salario ni e porcentahe. “A hisa benta corta, sin tene cuenta cu sindicatonan,” Maduro a splica. “Locual nos a pidi cu pa un otro biaha, reuni y delibera cu sindicatonan.”

Tambe a toca e carta cu sindicatonan a presenta na principio di November, y tabata sa kico ta bay logra cu e peticionnan describi den e carta, cu ta entre otro e compensacionnan pa locual trahadonan publico a perde. “Nos tabata kier sa si tin un ‘si’ of si e ta un ‘no,’ of kico por tin riba mesa cu Gobierno por ofrece e ambtenaarnan. Manera tur hende sa a corta salario y unico cos cu kier ta un trato husto y igual na otro sectornan di nos pais cu tambe a sufri cortamento di salario. Esey tabata e enfoke di e reunion.

Evalua na 2021

SADA, SIMAR y SPA tabata e sindicatonan cu a pidi e reunion cu Gobierno sinembargo a opta pa invita tur otro cu tambe ta representa otro trahado publico.

Maduro a sigui bisa cu e tres sindicatonan ta kere cu mester bin asina yama ‘toetsmoment,’ esta evaluacion di e decision. Esaki mester sosode na 2021. Nos sa cu e cortamento ta te ‘nader order’ pero nos ta sinti cu t mas cu necesario pa determina e ‘toetsmomenten.’ pasobra Gobierno ta optimista pa e recuperacion na 2021. y pa e momento ey ta pidi e evaluacion, cada dos tres luna, pa asina haya informacion con e desaroyo di Aruba ta bayendo.

Segun Maduro, esaki ta importante pasobra miembronan ta puntra e sindicatonan diariamente riba e tur locual nan ta tende. Incluso rumornan cu ta lanta e preocupacion di miembronan. P’esey mes ta importante pa sinta cu Gobierno pa haya informacion corecto.

Salario mandatario/parlamentario

Ministernan y Parlamentarionan tambe a mira nan salario baha. Prome Minister a informa e sindicatonan cu e reduccion aki tambe lo ta ‘tot nader order,’ pero pa e por sigui, Parlamento mester pasa un ley nobo, pasobra e reduccion di 2020 ta mara na un ley cu ta caba fin di aña. E reduccion lo mester bay via ley. Lo keda vigila pasobra net “ pa esnan cu ta miho paga den Gobierno, e ley pa nan reduccion di salario ta caduca na December,” Maduro a bisa, agregando cu e ta spera cu Parlamento pura pasa e ley proximamente pasobra prome di Januari ta un djis.

Salario companianan estatal

E trahadonan di companianan estatal tambe a haya reduccion den salario, y segun Prome Minister Evelyn Wever Croes, e mesun condicion ta conta, esta cu nan lo keda cu e reduccion te otro aviso. Pero riba su mes, e decision aki ta mas dificil, pasobra e no ta un decision directo di Minister encarga. Aki mester haya aprobacion di e companianan estatal pa asina e reduccion keda cana te nader order, pasobra en caso cu esey no sosode, e lo bira un problema pa e acuerdo cu Aruba a firma cu Hulanda. “Nos kier informa esaki na miembronan cu tur ora ta haci pregunta na nos, cu tanto Minister, Parlamentario y e trahadonan di e sector semi publico, tambe lo keda cobra menos salario te proximo aviso, y no solamente e ambtenaarnan.”

.