Diasabra 8 di januari Gobierno di Aruba a manda un carta pa sindicatonan SEPPA, SADA, SPA, SIMAR y FTA, unda cu ta duna nan un ultimatum pa locual ta trata e reunion cu e comision financiero, cu lo consisti di representantenan di Gobierno y di sindicatonan. Den e carta aki Minister President, Sra. Evelyn Wever-Croes a pone como ultimatum dia 10 di januari 2022 pa 12or merdia pa asina evalua si lo continua of no cu e reunion. 

Manera ta conoci pa algun luna caba sindicatonan ta hibando un lucha den cual nan ta exigi Gobierno di Aruba pa elimina e recorte salarial di 12.6% cu a cuminsa na mei di aña 2020. Despues di varios manifestacion y cartanan entrega, Gobierno di Aruba a informa e grupo di sindicatonan cu no por elimina e recorte salarial mirando cu e ta un condicion di Hulanda pa por ricibi sosten di likides.

Gobierno a invita e sindicatonan pa forma parti di un comision financiero cu lo consisti di expertonan den finansas di Gobierno y representantenan di sindicatonan pa asina por yega na un acuerdo pa dialoga cu Hulanda tocante e recorte salarial. Sindicatonan a informa tambe na varios ocasion cu nan ta habri pa dialoga y lo considera forma parti di e comision pero solamente si elimina e recorte salarial.

Aña nobo a habri y den bista cu no tin solucion ainda pa e recorte di salario, sindicatonan a manda un carta pa Gobierno di Aruba dia 5 di januari unda cu nan ta indica cu nan ta “lamenta e posicion di Gobierno como dunado di trabou pa mantene e retencion di salario di e trahado”.

“Teniendo na cuenta cu di banda di Gobierno no tin niun interes pa yega na un solucion pa cu e retencion di e 12.6% y tampoco riba e parti di compensacion pa cu e cortamento di salario, nos ta informa cu pa cuminsa recobra loke empleadonan publico a bin ta entregando, cu entrante 1 di februari 2022 empleadonan publico lo cuminsa traha dos dia menos pa luna. E posicion aki ta pendiente na un solucion pa cu e retencion di e 12.6%”, e sindicatonan a indica den e carta.

Minister President a contesta e carta aki indicando cu huridicamente e recorte salarial no ta un sancion y no por wordo considera desproporcional, inaceptabel y inhusto, ya cu esey ta criterionan cu ta wordo uza pa husga sancion.

El a informa den e carta tambe cu Gobierno ta dispuesto pa considera e proposicion di e sindicatonan pa traha menos ora luna pa cuminsa recobra tur locual cu nan ta entregando desde mei 2020.

“Mi por conclui cu e peticion di e sindicatonan awor ta pa laga e recorte di salario di 12.6% manera e ta, y a cambio traha menos dia pa luna, ekivalente na 12.6%. Esaki ta un proposicion cu Gobierno di Aruba ta dispuesto pa considera”, Minister President a indica den su carta.

Den e mesun carta aki Minister President a extende invitacion, un biaha mas, pa tres representante di sindicatonan pa un reunion cu e comision financiero awe dialuna 10 di januari 2022 pa 3or di atardi.

Den un carta di parti di e sindicatonan pa Gobierno di Aruba, nan ta remarca cu e sindicatonan ta mantene nan posicion inicial, cual ta pa elimina e recorte salarial di 12.6%. Nan ta splica cu e reduccion di oranan di trabou pa luna ta algo “temporal y no indefeni y mester keda suheto na evaluacion, unda ta compara e entrega desde mei 2020 te na momento di e ultimo luna di entrega, pa yega na e solucion cu realmente ta prueba cu e compensacion ta ekivalente en berdad cu e 12.6%”.

Sindicatonan ta remarca tambe cu nan ta dispuesto pa sinta na mesa cu nan dunado di trabou, esta Gobierno di Aruba,  pa dialoga y purba yega na un solucion. Pues nan ta enfatisa cu nan no lo sinta den un reunion cu e comision financiero cu Gobierno ta propone.

Den e carta di ultimatum, Minister President ta indica cu e proposicion pa forma e commision financiero cu e sindicatonan tabata pasobra e sindicatonan no tabatin confiansa den e informacion financiero cu Gobierno tabata presenta y a conclui cu sindicatonan no tin desconfiansa mas den e información financiero aki y lo stop di insisti pa un comision financiero.

“Gobierno kier haya por escrito di e sindicatonan SEPPA, SADA, SPA, SIMAR y FTA e confirmacion cu boso no tin necesidad mas di haya informacion financiero y no tin duda mas den e cifranan financiero presenta pa Gobierno”, e carta ta indica.

Gobierno ta en espera di un respuesta di parti di sindicatonan pa evalua si lo cancela e reunion di awe pa 3or di atardi cu e expertonan financiero.

Bon Dia Aruba a contacta Sra. Josephine Albertus, presidente di sindicato SIMAR, pa reaccion ariba e carta di ultimatum cu Gobierno a manda. Sra. Albertus a indica cu e sindicatonan lo reuni awe mainta pa delibera ki contesta nan lo duna na e ultimo carta aki di Gobierno.