Sindicatonan ta haci yamado pa “Dia Nacional di Accion” mañan diaranson

Manera a keda publica ayera caba, Minister President, Sra. Evelyn Wever-Croes, a publica un video caminda e ta duna contesta na e carta cu sindicatonan a manda pa gobierno dia 2 di december, den cual nan ta pidi pa elimina e recorte salarial inmediatamente. Minister President a contesta cu gobierno no por kita e 12.6% manera nan ta pidi.

Ayera mainta sindicatonan a reuni un biaha mas na SIMAR, pa asina dialoga ariba contesta di parti di Gobierno di Aruba y determina kico lo ta e siguiente pasonan cu nan lo tuma den nan lucha sindical. Den un entrevista cu Bon Dia Aruba, Sra. Josephine Albertus, presidente di Sindicato di Maestro di Aruba (SIMAR), a informa cu como sindicato nan ta keda para firme ariba e peticion pa elimina e recorte di 12.6%. Y sindicatonan a tuma e decision cu diaranson 8 di december lo tin un “Dia Nacional di Accion”.

“Nos a organisa diaranson awo un Dia Nacional di Accion, diaranson awo di 7:30 pa 9or di mainta, pa nos por mustra nos malcontento. Pasobra nos ta keda para ariba nos punto cu gobierno mester kita e 12.6% prome y despues nos por sigui wak con y kico nos lo por haci”, Sra. Albertus a indica.

Durante e reunion di dia 1 di december entre Gobierno di Aruba y e sindicatonan, gobierno a propone pa forma un comision cu lo consisti di expertonan financiero apunta pa gobierno y miembronan di sindicatonan, pa asina yega na un punto di salida hunto y dialoga cu Hulanda hunto.

Sra. Albertus a enfatisa cu e sindicatonan no ta di acuerdo cu e proposicion aki pa forma un comision mientras cu gobierno no elimina e recorte di 12.6%. E punto primordial poni den tur e cartanan cu sindicatonan a manda pa Gobierno di Aruba ta pa elimina e 12.6% inmediatamente. “Kita e 12.6 prome, nos ta keda ariba nos punto eynan, mester kita e 12.6% prome y despues nos por bay wak con nos ta sigui den dialogo”, el a agrega.

Ayera durante dia diferente departamentonan publico y semi-publico, entre otro Arubus, AruTram y Orthopedagogisch Centrum, a “walk-out” pa demostra nan mal contento cu e decision di gobierno y apoya e sindicatonan y demas departamentonan publico y semi-publico den e lucha pa elimina e recorte salarial.

Albertus a señala cu e “walk-out” di e luganan aki tambe ta parti di accion y mañan diaranson, cu lo ta e “Dia Nacional di Accion” lo tin mas sindicato, y tambe veld di enseñansa cu lo uni y sali hunto pa protesta e recorte salarial.

Pa loke ta trata e parti e sector di enseñansa, Sra. Albertus a indica cu Minister di Enseñansa, Sr. Endy Croes a informa cu e ta den dialogo ainda y cu e ta trahando ariba cierto puntonan caba. E recorte cu lo tin den enseñansa nan ta na altura aworaki cuanto e ta y na momento cu Minister Croes tin informacion concreto el lo informa SIMAR, segun Sra. Albertus a indica.

“Nos ta keda para ariba e punto cu nos no kier tende di recorte den presupuesto den enseñansa, pero nos kier tende di inversion. Y esey tambe ta e punto di bista cu e veld a vocifera y esey tambe nos ta keda para ariba dje”, el a agrega.

Gobierno di Aruba a bisa publicamente cu nan a pidi Hulanda pa reduci e recorte salarial na 6.3%, pa proximo aña. Bon Dia Aruba a puntra Sra. Albertus si esaki ta e caso, si sindicatonan lo sinta na mesa cu gobierno pa dialoga. Albertus a comenta cu nan lo keda para ariba eliminacion di 12.6% di inmediato y cu e 6.3% ta algo cu gobierno a bin cune unilateralmente atrobe. “P’esey nos a bisa tambe cu cada biaha ta bin unilateral, cu cifra cu porcentahe, pero nos ta bisa kita e 12.6% prome y despues no lo por sinta y wak mas dilanti con nos ta sigui”.

E sindicatonan a pidi gobierno claridad y transparencia pa nan por wak kico e recorte di 12.6% a genera y na unda e placa a bay, specialmente mirando cu Fase a stop. Albertus a señala cu esey tambe ta un problema cu nan tin cu gobierno. “Nos a pidi pa sa cuanto e recorte di 12.6% a genera, mustra unda el a bay. Aworaki cu Fase cu tur cos ta stop, pero nos no ta haya nada tampoco, nos ta pidiendo nan pa haya un overzicht di esey pero nos no ta hayando e”.

Ariba un website di noticia local, Albertus a comenta cu tin varios punto cu no ta cuadra cu realidad den e carta di gobierno. “SVB mes a sali bisa cu e loonsubsidie regeling aki tabata tanten cu ta hayando likides di Hulanda, por sigui duna e ayudo di loonsubsidie. Awo esey no t’ey pasobra Aruba no a ricibi sosten di likides for di Hulanda pa e ultimo kwartaal di aña. E loonsubisdie si lo keda den forma cu esunnan cu a haya di mas, nos tur a tuma nota di e 83.5 miyon cu ta riba caya y cu 8 miyon a bin back caba pero ainda tin un suma masha grandi riba caya. P’esey nan tin e mandato pa busca e fondo ey back e ora nos ta bisa no ta cuadra”, el a bisa.

“Tambe den e carta ta poni cu pa nos por sigui haya ayudo di Hulanda nos tin cu cumpli, cu tur hende tin cu yuda cu e recorte di 12.6%. Nos tur por a tuma nota di e uitvoeringsrapportage nan cu tin, di aña pasa y e aña aki, y no ta tur a entrega y toch nos a sigui haya e likides”, el a agrega.