Sindicatonan ta entrega Mocion di Desconfiansa contra Minister Lampe; Proximo aña escolar por cuminsa cu accion

Ayera tardi otro manifestacion di maestronan a tuma luga, net un siman despues cu un accion di maestronan a tuma luga pa expresa nan malcontento contra e maneho cu Minister Rudy Lampe a bin ta hiba riba tereno di enseñansa.

E biaha aki e grupo di manifestante bistiendo un t-shirt cu ta bisa: ‘Enseñansa bou atake’ tabata mas grandi. E accion aki tabata encabesa pa e sindicalista di SEPPA, Magaly Brito y presidente di SIMAR, Josefine Albertus. Nan a haci entrega di un mocion di desconfiansa contra di Lampe su maneho, tanto na Vice Presidente di Parlamento, Allan Howell y na Vice-Prome Minister, Otmar Oduber. Nan a priminti cu a pesar di e temporada di reces cu ta na porta, e docentenan lo haya contesta otro siman.

Preocupacion
Ainda ta persisti preocupacion cerca e maestronan y nan preocupacion ta varios. Tanto asina cu nan a yega adverti tanto na Parlamento como na Gobierno cu si no tin un contesta y cambio positivo riba nan preocupacion, nan lo habri aña escolar cu otro manifestacion.

Aunke nan por a mira un par di solucion, pero den gran parti ainda tin hopi docente ta mal contento. Nan ta spera cu nan no probecha e temporada di vakantie pa bin cu mas cambionan drastico, ya cu den pasado e cosnan aki a yega di sosode. Nan ta sinti cu no tin un deliberacion pa bin cu cambionan, sino cu e cambionan ta wordo imponi. Un di nan ta e proyecto mas grandi cu e mandatario kier ehecuta, esta Plan Educacional Nacional (PEN) 2030 pa cuminsa cu implementacion di Scol Arubano Multilingual.

SEPPA y SIMAR
Sindicalista Brito a declara na prensa cu den e curso di e ultimo simannan, nan a bin Bestuurskantoor y Parlamento pa vocifera diferente preocupacion di problemanan cu ta surgi na pia di trabou pa e gruponan di Scol Pa Ofishi (SPO), Traimerdia y Centro Multi Disciplinario (MDC). A pesar cu tabatin algun solucionnan tiki tiki biniendo, esaki no ta nifica cu e gruponan di e mundo di enseñansa ta trankilo.

Cronologicamente nan a yega di entrega un documento tocante e cantidad di esfuerso y intento pa Lampe duna atencion of cambia su postura contra e trahadonan di enseñansa. “Riba niun di nan el a duna oido,” el a bisa. Te hasta nan ta haya cu e forma con e mandatario a trata e asunto aki den Parlamento, practicamente nan ta haya cu e minister a bagatelisa e posicion cu e Parlamentarionan a tuma. “No tin respet ni pa e instancia mas halto di pais Aruba, corda pa nos profesionalnan,” el a bisa.

Dirigente di SEPPA a cualifica como ‘un masacre’ locual ta tumando diariamente na Centro Multi Disciplinario (MDC). E ta haya cu ta imposibel pa sigui sostene un maneho asina. P’esey nan ta exigi di gobierno pa bin cu claridad riba e maneho riba tereno di enseñansa. “No locual un minister kier impone den enseñansa,” segun Brito.

Igualmente el a bisa cu tur e asuntonan di preocupacion aki a wordo ilustra cerca Oduber, durante un reunion cu nan a sostene diamars ultimo cu e grupo di MDC. E ta kere cu awor e mandatarionan di e gabinete actual por tin un bista mas cla di tur loke ta pasando. Nan a mustra tambe cu cada biaha, palabracion haci ta cambia. Brito a cita como ehempel cu na januari, e tabatin un acuerdo di cabayero cu e trahadonan di SPO; pero recientemente ‘el a bolbe cambia e palabra y bay den e direccion cu e tabata kier.’

Presidente di SIMAR, Josefina Albertus, a gradici tur e docentenan cu a bin compaña nan y demostra na comunidad cu nan ta hopi descontento cu e maneho den enseñansa. Nan a entrega un Mocion di Desconfiansa, considerando cu for di basta tempo caba cu e trahadonan di e sector aki ta atendiendo cu Lampe, pero no ta mirando un mehoracion riba su intencion. Te hasta nan a yega di acerca Wever-Croes, pa e prome mandatario por intermedia y busca un solucion na e crisis aki.

Gobierno y Parlamento
Oduber a tuma e mocion di desconfiansa di parti di gobierno, ya cu premier Wever-Croes ta den exterior actualmente. El a bisa cu e preocupacion di e docentenan ta un preocupacion cerca nan tambe, ya cu enseñansa ta algo primordial.

El a referi cu e Minister di Enseñansa ta consciente di loke nan a trata pa busca un solucion pa e trahadonan di MDC, pero tambe nan kier bin cu trankilidad den enseñansa; pa nan por realisa e trabou di educa nos muchanan. El a priminti cu e carta entrega pa SEPPA y SIMAR lo wordo trata den reunion di Conseho di Minister diamars awor.

Di su banda, vice-presidente di Parlamento a bisa cu un gran parti di e Parlamentarionan ta afo debi cu nan a bay atende e reunion di IPKO, pero cu e lo percura pa cu cada un di nan lo haya pronto un copia di e carta entrega pa e dos sindicatonan cu ta representa e trahadonan di enseñansa. E ta spera cu denter di un siman nan lo percura pa nan haya un contesta na e manifiesto aki.