Sindicatonan SIWA y ALVAST: No por permiti Gobierno hinca man den salario sin mas; Ambos ta cuestiona falta di legislacion pa e fondo di FASE y ta pendiente casonan den Corte

Con por ta cu Gobierno tin manera pa sigui brinda sosten humanitario manera FASE sin e contribucion di trahadonan di entidadnan di Gobierno, ta e reaccion di Presidente di SIWA Ricky Henriquez riba un declaracion di Minister Xiomara Maduro. Pero, tambe e sindicato ta cuestiona henter e forma con Gobierno a bin ta maneha e fondo di FASE y e manera con a retene salarionan.

“Corsou a regl’e bon. No manera Aruba unda awor ta bay uza nos como zondebok.” Ricky Henriquez di SIWA a referi na e ley cu Gobierno di Corsou a manda pa Parlamento di e isla ruman, unda a determina e sueldo maximo pa top funcionario den companianan y entidadnan estatal, ademas di mara e reduccion di 12.5 ( na Aruba e ta 12.6) porciento den salario y beneficio pa un aña.

SIWA ta pendiente e caso cu a entama contra Directiva di WEB cu a corta den e salarionan di Januari y Februari sin cu a yega na un acuerdo cu e trahadonan. E caso lo tuma luga dia 10 di Maart proximo.

Ricky Henriquez a bisa Bon Dia Aruba locual kier tende di huez ta pa para e recorte den salario pa forsa Directiva y Gobierno negocia cu trahadonan riba nan contribucion pa FASE. “Pasobra e ora ey nos lo por regl’e na forma drechi. Asina simpel.”

Declaracion Minister di Finanzas

SIWA a keda sorprendi cu e declaracion di Minister di Finanzas Xiomara Maduro unda el a bisa cu obstante e decision di Corte, cu e lo no tin efecto riba e ayudo humanitario na Aruba “anto mi no ta compronde pakico nan a bay Corte cu nos. Politica ta algo straño. E ta sorprendi mi tur dia. Pasobra practicamente e ta bisa cu nos di WEB lo no stroba e ayudo humanitario, pasobra den Corte a argumenta cu hende lo bay sufri si trahadonan di entre otro WEB contribui.” Pa Henriquez e declaracion aki ta duna hopi di pensa, y p’esey ta pendiente e resultado pa abogado por bin splica tur hende, “manera nos ta mucha chikito, pa nos compronde. Y nos ta pidi’e conseho, no obstante kico e resultado lo ta.”

Ley na Corsou

No tin duda cu Aruba lo bin cu un ley similar na esun cu Corsou a presenta recien na Parlamento, Henriquez a bisa. “Y locual lo sosode na Aruba ta cu nos lo bira e ‘zondebok’ pa e ley aki, cu ta mas bien un negligencia. Ta tempo di eleccion, pues ta Gobierno ta bay tira culpa riba SIWA cu mester a bin cu un ley asina.” Y esey ta algo cu no ta culpa pa trahadonan.

Negligencia

Pa SIWA, e hecho cu tin diferente caso awor den Corte ta muestra di un negligencia di parti di Gobierno pa controla ken a duna pa FASE of no. “Ningun hende a controla esey. Gobierno no tabata sa mes. Ta ora cu SIWA a bati na e bel na November, ta e ora a ripara cu a haci fout di publica algo cu no tabatin base. Gobierno no a controla y otro tin cu wanta e golpi.”

Si SIWA mester gana e caso, e ta bay un drama den sentido cu huez lo ilustra e negligencia di parti di Gobierno. Pero Henriquez no ta duda cu manera semper, lo tira culpa riba e trahadonan di WEB, “pasobra di no kier ta solidario.”

Corsou no a actua asina. Pasobra nan a cuminza cu e proceso pa medio di ley. Si Parlamento acepta e ley, ningun hende por bisa nada, ni sindicatonan, pasobra e ta un ley. “Si mester resulta cu SIWA ta gana su caso, riba ken e ta refleha? Esey ta e ‘million dollar question.” Henriquez a bisa cu contrario na Aruba, trahadonan di entidadnan publico na Corsou no a entrega salario na 2020. “Nos ta keda warda trankil dia 10 di Maart. Nan a acusa cu nos lo pone Aruba plat, pero wak con tur hende tin coriente y awa. Nunca e intencion tabata pa pone Aruba plat.” Pero Ricky Henriquez ta prepara si cu lo tira culpa riba SIWA di no kier ta contribui na FASE.

ALVAST

Mientras cu SIWA ta pendiente su caso, ALVAST cu ta representa e staf di Elmar tambe a dicidi pa bay Corte. E argumento ta mescos, esta cu Gerencia a corta den salario sin cu a yega na un acuerdo previo. Raymond Maduro di e sindicato a bisa cu e mes no ta kere cu Corte ta mira nan peticion mescos cu esun di SIWA ya cu a dicidi di pone otro fecha y no a referi mes na e caso di dia 10. “Nos a haya un fecha cu ta 25 di Maart, cu segun mi nan ta trata diferente. Pasobra di otro forma nan lo a pone e caso e mesun fecha cu esun di SIWA. Mi no ta kere cu Corte como tal ta considera e dos casonan similar. Alomenos cu huez bisa cu e ta conta pa tur hende. Pero nos caso ta sigui dia 25 di Maart.” Maduro a splica cu tabatin varios hende ausente na Corte pa motibo di Covid y a tarda pa duna e sindicato un fecha pa e caso sumario y ta e siman aki a haya un fecha. Consecuentemente e ta convenci cu ni Corte ta considera cu e casonan di SIWA y ALVAST ta mescos.

ALVAST a bisa cu berdad tabatin un acuerdo cu gerencia di Elmar pa 2020, unda a retene 12.6 porciento di salario y beneficio y den e protocol a permiti pa Elmar keda cu e fondo cu tabata 1.6 miyon florin pa absorba e perdida cu a sufri debi cu hotelnan diripiente tabata consumi menos coriente y a haci impacto riba e cifranan di e compania. “Consumo a cay pisa, y a bay de acuerdo pa yuda e cashflow di Elmar.”

Di su banda Ricky Henriquez di SIWA a bisa cu na WEB, nan tabata na altura cu e placa cu a retene di trahadonan di ELMAR a bay pa yuda nan compania. Pero su pregunta ta keda si, na ken realmente e contribucion a yuda. “Nos di WEB ta contribui na Utilities, ta paga dividendo na Gobierno plus ta contribui na FASE. E cos aki ta masha straño.”

Retencion na 2020 tabata a base di protocol

Locual Maduro ta bisa cu e problema ta cu e acuerdo na 2020 tabata cu ex Director di Elmar, Ing. Koolman. Mientrastanto Elmar tin Director nobo, esta Sr. Anthony Irausquin cu apenas tin algun siman den e funcion y “e no a scoge pa banda di e trahadonan. E ta para na banda di Utilities,” den concepto di Maduro di ALVAST. “Si e no para nos banda, ta con por sigui? Pasobra despues nos tambe por bisa cu nos no tin confianza den e director.”

Prome cu a dicidi pa tuma e paso pa bay Corte, ALVAST a informa gerencia cu mester stop e retencion, “pa asina por bay na mesa y yega na un acuerdo pa e solidaridad cu comunidad. Tanten cu nan no haci’e, nos no ta dispuesto pa acepta.”

Ley di solidaridad pa tur cu ta traha

Maduro no ta mira pakico ta e companianan di Gobierno so mester contribui na e fondo di solidaridad. Tin companianan di seguro, otro hendenan cu no a perde entrada cu tambe lo por contribui. “Tin companianan di abogado, tin mas instancia. Bin cu un decreto y bisa cu e contribucion na e fondo ta conta pa henter Aruba y ta cla.” Maduro ta bisa cu tin un diferencia entre personanan cu a bay de acuerdo pa gana menos pa asina nan por keda cu trabou, y otronan cu sin mas ta bin corta den nan salario, sin nan aprobacion. “Si huez mester bisa cu por corta den nos salario sin mas, kiermen cu despues cu Gobierno mester placa atrobe, por djis sigui tira man den sueldo di trahadonan di entidadnan di Gobierno. Esey ta democracia? Mi no ta kere.”

Parlamento no sa di nada

Raymond Maduro a bisa cu, mescos cu e caso di SIWA, cu e no ta compronde pakico Gobierno no por a regla e asunto pa medio di ley mescos cu Corsou a haci’e. “E cuater sindicatonan, incluso FTA, a reuni cu Minister Presidente cu a bisa nos cu nan ta preparando un ley. Pero nos a reuni despues cu Parlamento cu a laga sa cu nan no a tende nada di Gobierno. Nan no a haya ningun informacion di Gobierno.” Locual Maduro ta haya inaceptabel tambe ta cu aplica e asina yama Wever-Croes norm como salario maximo pa ehecutivonan halto, sin cu a defini esaki den ley, manera tabata e caso na Corsou. “E ley no a pasa, y ya a aplik’e p’e. Y e tin consecuencia pa tur hefe y gerente. P’esey mester evalua.”

Di su banda Ricky Henriquez di SIWA a bisa cu e ta interesa pa sa kico huez lo bisa den e caso cu ALVAST a entama, pa sa si e resultado lo ta mescos. Di su banda STA, cu ta representa un gran parti di trahadonan di Elmar ta pendiente e decision di huez riba e caso di SIWA y no a uni na e caso sumario cu ALVAST a entama pa dia 25 di Maart.