E lucha pa elimina recorte di salario di 12.6% entre empleadonan publico y semi-publico ta continua unda cu sindicatonan a dicidi di tuma accion pa cu esaki algun dia pasa. Esaki a causa un molestia pa gobierno. Ayera mainta a keda conoci cu Sindicato di Aduana (SADA) y Sindicato di Polis (SPA) a bay Corte pa e caso cu gobierno a entama contra nan.

E caso cu a cuminsa 8or y mey di mainta a caba den oranan di merdia, unda cu Edward Maduro, presidente di Sindicato SADA a expresa cu pa loke ta trata nan caso, nan no tabata den accion, sino cu miembronan a dicidi di tuma nan oranan ekivalente na e recorte di 12.6%.

Ademas, el a menciona cu nan a splica hues cu no tin ni un manera cu Pais Aruba por proba cu nan a haci un yamada pa welga, sino cu nan a haci un accion. Tambe Maduro a expresa cu for di 2015 cu nan directiva a sinta cada biaha cu nan ta bay den accion, nan ta informa na minister. Y e biaha aki nan no a haci’e pa motibo cu nan no tabata pensa di bay den accion. “Mas bien nos a tuma e oranan cu nos no ta wordo paga”, el a sigura.

Den nan opinion “no por marca oranan cu no ta paga mi como accion,” y esey ta e punto cu nan a trece dilanti. Maduro ta kere cu ta hopi cosnan mas cu a wordo papia den Corte ya caba a wordo treci dilanti den casonan di Sindicato di Maestronan (SIMAR) y SEPPA algun siman atras.

“Mi ta kere atrobe ta mustra duidelijk cu gobierno no tin ningun tipo di structura ni ningun tipo di plan pa locual ta trata e situacion cu nos ta aden di 12.6%”, Maduro a enfatisa.

Asina mes, el a sigura cu nan ta riba bon caminda, pa motibo cu nan ta para riba e derecho di trahadonan y tanten cu nan no ta wordo paga y no ta den situacion di crisis den sentido di FASE cu subsidio di salario, manera el a bisa, “nos no mester ta solidario na niun hende mas aworaki y esey ta e punto cu nos tin”.

Tambe el a sigura cu posiblemente e dia 30 di maart lo tin un sentencia of lo dicidi di sluit aan e tussenvonnis cu tabatin siman pasa.

Di su parti, Rodney Solognier, presidente di Sindicato di Polis (SPA) a splica cu den su opinion e caso a bay hopi positivo y den bon direccion pa nan. “Nos tin di obliga di warda te dia 30 of cu speransa cu ora cu lo agrega esun di SIMAR cu SEPPA, por ta nos por haya un contesta mas trempan.”

Nan a papia tocante varios punto cu gobierno a trece dilanti, na unda cu nan, segun Solognier “ta para duro tocante e boeman e cual no ta berdad, pasobra a nos ta bringando simplemente pa nos derecho. Y nos a trece diferente manera di con nos por haci pa nos por yega na un solucion, pero gobierno ta para duro cu ta nan manera of the high way”, Solognier a expresa.

Roland Maduro, vice-presidente di sindicato, a comenta cu den Corte gobierno a bay riba nan bisando cu e dia cu nan a pone nan trabao plat nan no tabatin hustificacion. Nan a bisa cu nan tin bon contacto cu alto comisario di polis cu na e momentonan aki ta Irma Gordon, y nan a bisa tambe na hues cu nan tabata cu personal minimo, unda cu el a enfatisa cu e unico cu persona cu nan tin cu dirigi nan mes na dje ta ehalto comisario di polis, kende mester wordo poni na haltura di kico e sindicato ta haciendo pa cu e miembronan di polis.

Ademas, Maduro a señala cu den corte gobierno a keda para riba crisis pa via di pandemia, unda cu abogado a bisa cu Aruba ta den crisis for di aña 1986 despues di Status Aparte. Esey ta e parti cu e abogado a enfatisa.

“Nos no ta wak mehoracion y nos ta espera cu tambe e hues wak banda di e trahado. Y manera nos a splica cu SEPPA, SIMAR, SADA y SPA a keda y ta bay keda te na ultimo pa bringa pa e trahado y tambe pa sigui na e vanguardia di e trahado, pa nan voz sigui resona den pueblo. No ta polis so, no ta juffrouwnan di scol so, nos tur, tur sindicatonan cu t’ey ta para pa nan trahado”, Maduro a manifesta.

Nan tambe ta espera cu pa dia 30 di maart hues lo duna un bon sentencia manera Madura a afirma y di su parti Solognier a declara cu nan moral ta un tiki abao pa motibo cu tur hende kier nan placa back, situacion ta birando caro dia pa dia, den ultimo tempo por a mira cu prijsnan a subi hopi halto cu menos placa den cartera “y esey ta afecta nos tur”, el a bisa.