Ayera a tuma luga e “Dia Nacional di Accion”, unda cu un grupo di sindicatonan y di lugarnan publico y semi-publico a sali for di trabao pa protesta nan mal contento cu e situacion actual alrededor di e recorte salarial di 12.6%.

Post Aruba NV.

Bon Dia Aruba a combersa cu Sr. Derrick Geerman, trahado di Post Aruba NV y Shopsteward di SEPPA durante e protesta di e trahadonan di Psot Aruba. Sr. Geerman a expresa cu nan tur ta hopi mal contento cu e 12.6% . pasobra Gobierno di Aruba a bisa pa nan bay negosha na mesa pero esey no tabata berdad, segun el a indica.

“Unico cos cu mi ta pidi gobierno ta pa kita e 12.6% pa wak kico nos por haci na otro manera pasobra segun mi tin entendi esey tabata parti di Fase pa yuda esunnan cu no tabatin trabao y actualmente nan a entrega esey, dus aworaki tambe nos ta pidi pa nos por haya nos salario back manera mester ta”, el a bisa.

El a señala cu nan lo sigui lucha pasobra e ta nan salario. “Nos tur a depende semper di nos salario completo tur aña”. El a splica tambe cu den e recorte nan a hasta kita e aumento cu nan tabata ricibi cu tur aña di 105 florin y aworaki esey nan e vries tambe y nan tin mas o menos dos aña caba cu nan no ta haya un aumento riba nan salario.

“Esunnan cu a cuminsa ultimo nan salario no ta subi cu nada, toch esunnan cu tin mas tempo aki den tin nan salario, pero esunnan cu a drenta ultimo e ta keda mesun caminda para y esey no ta husto tampoco”, el a agrega.

Algemene Ziektekosten Verzekering (AZV)

Trahadonan di AZV tambe a uni na e “Dia Nacional di Accion” y sali protesta y mustra solidaridad cu e lucha sindical. Sr. Errol Bremo Shopsteward di FTA na AZV a indica cu mas o menos 30 trahado, e grupo cu ta entregando e 12.6% a walk out, e otro grupo di trahadonan di AZV cu no ta pasando den e problema aki no a sali.

Sr. Bremo no a informa con e accion di un ora a afecta e trabao di AZV, pero locual si el a bisa ta cu e trahadonan a purba di haci nan trabao lo miho posibel pa durante e ora aki di accion nan por tabatin e espacio pa expresa nan mal contento sin perhudica e trabao. “Pero ta bay tin cosnan cu lo pasa, pero esey nos lo mester wak”, el a bisa. “Aworaki e ta djis un accion chikito, pero si nos no haya feedback positivo di gobierno nos no por garantisa kico lo por bin despues”.

El a señala cu nan a entrega e 12.6% cu a bin den diferente forma, parti di salario, parti di beneficionan secundario, pero con cu bay bin tur ta placa tur ta cosnan cu ya e trahado ta custuma di biba y aworaki diripiente nan ta wordo kita. El a enfatisa, mescos varios sindicato y lugarnan, cu nan ta compronde cu e recorte salarial tabata pa un bon causa, pa yuda cu Fase, pero aworaki cu ta kita esey e pregunta cu e ta haci ta, pakico gobierno kier keda kita e suma di placa. Varios propuesta a bay na gobierno y ainda no a yega na algo concreto y pa e motibo, el a indica, e trahadonan a walk out, “nos por a resolve esaki na mesa sin cu nos mester a yega na e punto aki”, el a bisa.

“Mesun cos e ta dificil pa kita e ta dificil pa biba sin dje dus aworaki nos ta bay wak ken ta pone mas presion ariba ken y esey no ta e intencion, no ta loke nos kier. Nos kier soluciona esaki, sigur den e temporada di fin di aña cu ultimo cos cu bo ta pensa ta riba haci manifestacion pa expresa bo mal contento. Kiermen e mensahe pa gobierno lo ta pa please ban back na mesa y ban yega na algo”, el a agrega.

Sr. Bremo a indica tambe e ta compronde cu gobierno ta den “desesperacion buscando un solucion”, pero e recorte di 12.6%, el a enfatisa, no ta e solucion corecto pa e crisis cu Aruba ta pasando aden. “No tin un manual con pa sali afo di un pandemia, for di un crisis y mi ta compronde cu gobierno tambe ta den un desesperacion buscando un solucion, pero nos no ta kere cu esaki te y mas ora cu bo tin tur e organisacionnan aki na mesa dispuesto pa yuda, pero bo tambe tin cu duna di bo banda”, el a bisa. “E peticion ta pa kita e 12.6%, ban sinta ban wak kico ta e otro formanan cu nos por yega cu bo por spaar e placa eynan tambe di otro maneranan”.

Setar Aruba NV

Na e accion di protesta, Bon Dia Aruba a combersa cu Sr. Jeromin Kelly, presidente di Sindicato STT. Sr. Kelly a conta cu e accion di protesta a bay bon y manera na tur otro luga den transcurso di dia, nan tambe a walk out pa mustra nan descontento di con e retencion di 12.6% ta bayendo. El a splica cu na cuminsamento di e pandemia di berdad nan a compronde cu pais Aruba tabata den un situacion hopi dificil. Gobierno a acerca nan pa ta solidario cu pueblo y el a menciona Setar NV tabata un di e prome companianan cu tabata solidario cu e pueblo, pero e solidaridad ya no tabata opcional, segun el a expresa.

“Mas y mas nos ta ripara cu aworaki nan no ta pidiendo nos pa ta solidario mas, nan ta exigiendo nos pa entrega y esey ta inaceptabel vooral cu bo ta pidi pa nos entrega anto boso mes ta hisando boso costo di gasto di personal cu 8 miyon otro aña, dus e ta inaceptabel”, el a enfatisa.

Otro cos cu Kelly a subraya cu nan no contento cune ta cu nan ta tende for di un minister cu e placa, e 5% di december pa companianan estatal por keda pa e compania y di otro banda nan ta tende otro minister bisa cu CAft a bisa cu e placa ey tin cu bay den e caha di gobierno. “Si e bay den caha di gobierno ta cua persona e ta bay yuda, dus esey ta e claridad cu nos ta buscando for di gobierno pa asina sa kico nos ta bay haci, pero pa aworaki nos ta contra di e 12.6%”, el a agrega.

Pa loke ta trata e “performance bonus”cu e compania estatal Setar a ricibi, Sr. Kelly ta splica cu compania nacional Setar ta draai den ganashi. El a indica cu aña pasa e compania tabatin un aña hopi duro, pero cu e aña aki ta bayendo hopi mas miho y ta pa e esfuerso di aña pasa cu e aña aki, cu e trahadonan a sigui traha, nan a bringa pa e ‘performance bonus’. “Tambe pasobra si un otro compania cu no a entrega na fondo di Fase, no tabatin perdida a logra haya bonus, dicon nos no por logra haya? Dus esey ta pakico nos a bringa pe tambe”, el a bisa.

Tocante e peticion cu Gobierno di Aruba a haci na Gobierno di Hulanda, pa reduci e recorte salarial na mita, na 6.3%, Sr. Kelly a indica cu e e prome pregunta ta dicon net mita? Dicon no 5% of 3%, dicon net mita? “Si no tin splicacion pakico net mita of dicon no por un tiki mas of un tiki menos, e ora nos ta mesun leu. Dus no bisa mi cu bo ta pidi halvering y aki seis luna bo ta bisa mi nos bo ta caminda cu bo kier ban sigui entrega. Esey no ta bon”, el a termina.

Por ultimo el a señala cu si e reaccion di parti di Gobierno di Aruba no ta positivo pa nan, e no ta descarta cu e accionnan aki por sigui, awe e grupo di sindicatonan lo reuni pa asina fiha nan posicion y dialoga ariba kico lo pasa den futuro.