Sindicatonan: “Premiesnan cu tin cu keda paga tur aña, ta indexering cu gobiernonan a keda debe na funcionarionan publico”

Diferente sindicato di Aruba a tene un conferencia di prensa e dia di ayera pa asina trece dilanti dos topico cu ta trata indexering y premies, mirando cu otro siman nan tin reunion cu prome minister tocante esaki y nan kier informa nan miembronan manera mester ta.

Den conferencia aki tabata presente sindicatonan SADA, Seppa, Simar, FTA, Simba y SPA ken a traves di Edward Maduro ken ta fungi como presidente di Sindicato di Aduana di Aruba (SADA) a recorda cu na 2019 sindicatonan a cuminsa negociacionnan cu Gobierno di Aruba pa loke ta trata indexering riba aña 2018, esaki ta den cuadro di cumplimento di Bilateraal Akkoord Indexeringsoverleg cu a ser firma na 2014 “y lamentablemente nos tin cu bisa cu na 2019 nos no a logra finalisa e discusionnan rond di e tema aki, mirando cu varios reunion a tuma luga, e tempo ey, fin di october 2019 nos a haya un propuesta di parti di gobierno pa lo cual sindicatonan y miembronan a rechasa esaki rotundamente ya cu esaki tabata un falta di respet den nos concepto e tempo ey, lamentablemente ora cu 2020 a habri pandemia a dal y esaki a pone cu tur e discusionnan a bay on hold,” Maduro a sigura.

Debi na esey, miembronan ta puntra na sindicatonan kico a pasa cu e tema aki mirando cu segun Maduro a declara, tin un informacion eroneo di parti di gobierno pa loke ta trata bashie premie, gelijk bedrag y reparatiepremie, pa e motibo ey nan a haya prudente tene un conferencia di prensa pa cuminsa duna informacion y splica na e funcionarionan publico kico ta bay sucede den dianan venidero.

Di loke ta trata e tema di indexering, Maduro a bisa cu na october di aña pasa nan a manda un peticion pa prome minister Evelyn Wever-Croes pa un reunion cu caracter di urgencia, unda cu nan kier a trata e topiconan aki pero na fin di october nan a haya e contesta di prome minister informando di un comision, “sindicatonan no ta di acuerdo pa papia di un comision ainda y nos no a haya e reunion e tempo ey, finalmente siman pasa nos a haya un invitacion pa un reunion otro siman pa trata e temanan aki cu prome minister,” el a bisa.

Maduro a comenta cu contrario na creencia di algun persona cu sindicatonan no ta bezig riba e topico aki, Maduro ta enfatisa cu nan ta traha conforme uitvoering bilateraal akkord di 2014, na unda gobierno y sindicato a firma un acuerdo unda lo bay cuminsa cu e topico di indexering 1 di januari 2019, gobierno e tempo ey mester a zorg pa un comision traha riba un indexeringmechanisme unda cu lo bay evita tur discusion of problema en cuanto e topico di indexering pa futuro, “cu lo mester bin na un manera automatico cu si acaso tin inflacion den añanan anterior, esaki lo ser compensa pa e perdida di forsa di compra, pero gobiernonan tabata dehado y esaki no a tuma luga, pa e motibo ey nos a informa gobierno na 2019 cu tanten cu nos lo no logra yega na un acuerdo pa lo cual ta trata inflacion cu tabatin na 2018, nos no ta bay forma parti di ni un comision pasobra gobierno a faya e funcionarionan publico.”

Manera Maduro ta menciona, cu añanan nan ta bin ta ripara cu inflacion a sigui asota no solamente e miembronan sino tambe e pueblo di Aruba, “por tin algun dunado di trabou priva cu a compensa esaki, otronan no, pero sigur funcionarionan publico no y esey ta pone cu gobierno a mustra di ta un mal dunado di trabou,” el a sigura.

Aworaki, e discusion cu ta bay bin riba e topico di indexering na unda ta papiando di cifranan di inflacion basta halto, segun Maduro a señala cu si ta pone tur cifra hunto, ta papiando di cifranan cu ta bay pasa 10% di inflacion den tur e añanan total y nan ta na spera di tur e cifranan di 2023 pa asina nan wak cuanto lo bay bira pero nan ta sigur cu lo pasa 15% di inflacion total.

“Costo di bida a subi drasticamente vooral bo a wak cu un BBO na frontera cu no a yuda na nada, al contrario, el a yuda si pa gobierno haya extra entrada pero nos ta spera cu funcionarionan publico tambe para keto un rato y bisa cu nan tambe merece di haya un ahuste, pasobra e costo di bida a subi drastico pa nos tur.” Maduro a afirma.

Di bashie premie, gelijk bedrag y reparatiepremie, Maduro a trece dilanti cu nan a scucha un declaracion di prome minister aña pasa e cual nan a categoris’e como un “mal informacion” na e pueblo y na funcionarionan publico unda ta indica cu premie ta caba e aña aki y Maduro a desmenti esey bisando cu “na ningun momento e premie aki por finalisa e aña aki pasobra nos ta papiando cu gobierno a keda debe indexering den e añanan anterior cu a pone cu a freeze e tempo ey indexering.

“Pa aña 2002 cu 2007 si mi no ta hera, a freeze como 7.6% di indexering anto ora cu gobierno a sinta cu sindicatonan na 2014, a yega na palabracion mirando cu situacion di gobierno na e tempo ey no a duna pa por a indexering e salario di funcionario publico ya cu por a conduci na gastonan hopi halto pa gobierno, e tempo ey sindicatonan a bay di acuerdo pa bin ahusta e premiesnan cu tabata existente caba manera bashie premie y gelijk bedrag y tambe a bay di acuerdo pa bay cu un premie nobo e cual a ser duna na augustus, den esey, gobierno mester a keda paga tur aña un aumento den e premiesnan aki pero sigur, e premiesnan aki ta un manera pa compensa e perdida di forsa di compra.”

Maduro ta sigura cu esakinan ta premiesnan cu tin cu keda paga tur aña, cu por ser considera como dianan di ATV cu ta ser duna “ta indexering cu gobiernonan den pasado a keda debe na funcionarionan publico.”

Nan como sindicato ta haya cu gobierno mester informa debidamente pa motibo cu for di 2018 segun Maduro a splica, nan a keda pega riba e tema di indexering, cu cifranan di inflacion durante e añanan ta hopi, costo di bida a subi y nan ta kere cu a yega pa sinta na mesa conhuntamente cu gobierno y duna e funcionarionan publico e fairshare.

E biaha aki sindicatonan no a trece dilanti e topico di prestatiemanagement cu tambe ta un tema cu a keda pendiente, sinembargo, Maduro a contesta na redactor di Bon Dia Aruba cu otro siman nan ta bay enfoca riba dos tema cu ta indexering y premiesnan “pero lamentablemente mi tin cu bisa cu a nos como bloki sindical nos no a haya ni un tipo di update mas di esaki di banda di gobierno pero esey sigur ta un otro tema cu kisas ta bay bin dilanti den otro ocasion, pero mi ta kere e parti principal aworaki pa nos ta e reunion di otro siman y informa e funcionarionan publico, aunke esey ta bay bira un punto di discusion pasobra e ta algo cu pa nos ta preocupante tambe,” Maduro a finalisa.