E 15 sindicato cu ayera a organisa un paro nacional na Corsou no a bay di acuerdo cu e proposicion di gobierno riba nan puntonan.
Manera nos a trece den nos edicion di ayera e sindicatonan a forma un bloke y ya a cuminsa riba dialuna forma cera caminda. Esaki a resulta na varios detencion. E bloke sindical ta den protesta pa motibo di e retiro masal na UTS.
E compania aki kier kita 280 hende. Gobierno ayera a cuminsa negocia sinembargo e punto aki a keda sin solucion riba mesa. Un otro punto tabata aumento di e salario minimo. Gobierno di Corsou a bisa ayera cu lo hisa e suma cu 17,5 cen pa ora, asina nos partner den noticia Ret Karibense ta informa. Tambe nan a anuncia cu lo para e aumento di e seguro WA, pero pa e sindicatonan esaki no ta suficiente. Nan no kier palabranan di gobierno si pero tambe mas detaya y garantia. E suma tampoco nan ta haya suficiente como cu nan a pidi pa un aumento di 9,17 florin pa ora pa 9,80 florin pa ora.
Riba potret por mira hende acumula riba Wilhelminaplein ayera, sperando e resultadonan di e negociacion entre e bloke sindical cu gobierno. E sindicatonan envolvi ta representa trahadonan di Aquaelectra, transport publico, Curoil, waf y refineria Isla. Oficina di turismo di Corsou CHATA a reacciona cu nan ta preocupa. Esaki pasobra tin hopi turista riba e isla den e temporada aki y si e paro ta afecta e turismo, esaki lo por tin consecuencianan grandi pa e economia, asina nan a comenta.
