Ayera mainta, gobierno a invita sindicatonan pa sinta na mesa pa 3pm pa discuti e decision di Conseho di Minister di Reino – esta cu no por stop e recorte di 12.6 di salario. Sinembargo, despues cu e sindicatonan a ricibi citacion di hues pa presenta proximo diabierna mainta pa trata e caso, nan a dicidi pa no presenta ayera sino warda resultado di nan caso proximo siman.
Mediador di gobierno, Anselmo Pontilius a duna declaracion na noticiero online, 24ora, den cual el a bisa cu ‘mayoria di sindicatonan no a bini’ na e reunion convoca pa prome minister, Evelyn Wever-Croes. Ocho sindicato no a atende, cual ‘ta duna indicacion cu e malcontento ta grandi’. Pero e reunion a continua, y den esaki, segun Pontilius, Wever-Croes a splica e motibonan pakico gobierno no por stop e reduccion di salario. Ademas a sondea e posibilidad di haya alternativanan pa por sigui negocia. “Teniendo cuenta, uno, cu bo tin contra SEPPA y SIMAR un caso sumario otro siman, pero esey no mester stroba e partidonan pa yega na un acuerdo”, Pontilius a declara.
“Pasobra asumi si hues bisa cu ta OK pa bo traha menos ora pa siman of pa luna pasobra bo ta haya menos salario, con bo ta bay atende cune? Si hues bisa no, tambe bo ta bay tin cu keda na mesa, pasobra e punto principal ta cu empleado publico ta bisando ‘no sigui kita mi 12.6 porciento e aña’ki’”. Pontilius a mustra comprension pa e situacion di incertidumbre di e ambtenaarnan, mirando e aspecto ‘tot nader orde’ di e recorte.
Pero segun Pontilius, ‘mester tin otro alternativa con bo ta resolve esaki awo y pa e proximo añanan’.
E caso sumario contra SEPPA y SIMAR ta programa pa diabierna proximo, dia 11 di februari, pa 9am.
Potret di archivo.
