Diahuebs atardi e grupo di sindicatonan a tene un rueda di prensa pa duna informacion y aclaracion pa locual ta trata e lucha di e sindicatonan durante e ultimo simannan tocante e recorte salarial di 12.6% di empleadonan publico, companianan estatal, pensionadonan y demas organisacionnan.

Presidente di Sindicato SADA Aruba, Sr. Edward Maduro, a recorda cu siman pasa diahuebs 25 di november e sindicatonan durante e accion di manifestacion a entrega un manifiesto na gobierno unda cu ta trece algun punto pa dilanti cu e sindicatonan a ricibi for di nan miembronan pa presenta na gobierno, cu ta relevante pa locual ta trata e recorte salarial.

E punto primordial cu e sindicatonan a trece pa dilanti ta cu mirando cu Fase a termina y e posicion inicial pa loke ta trata e recorte tabata primeramente pa e 12.6% wordo hinca den un fondo pa asina Fase por a existi, sindicatonan ta di opinion cu e 12.6% mester stop per direct y e segundo punto ta cu si mester bin cambio of mester tuma algun decision, gobierno mester sinta na mesa di negociacion cu sindicatonan pa wak con nan por yega un caminda cu tur hende por biba cune.

Sr. Maduro a indica, cu siman pasa e grupo di sindicato a bisa gobierno cu nan kier un contesta dentro di un siman y nan a pone como deadline dia 2 di december. E grupo di sindicato a ricibi un invitacion for di Ministerraad pa un reunion cu a tuma luga diaranson1 di december pa asina ricibi un splicacion pa locual trata nan punto di bista di a manifiesto cu nan a entrega.

El a splica cu durante e reunion Minister President a propone na e sindicatonan pa bin cu un comision pa asina hunto cu expertonan ariba tereno di finanzas publico wak kico ta e posibel partinan cu nan por dialoga ariba dje y con nan por yega na e parti di eliminacion di e 12.6%, cu ta e punto principal pa e sindicatonan.

Segun Maduro a informa, ya caba Minister President y gobierno tin tres experto ariba e tereno di finanzas disponibel pa bay den e comision, y Minister President a bisa e sindicatonan presente na e momento ey cu e decision ta keda na e sindicatonan si ta acepta e comision, den ki forma e comision aki lo funciona y cuanto participante lo mester bin den comision.

E sindicatonan cu tabata presente na e reunion a informa Minister President y Ministerraad, mirando cu ta danki na e sindicatonan cu a firma e manifiesto cu a wordo entrega dia 25 di november e reunion cu gobierno a wordo yama, cu nan lo bay back den nos seno pa asina delibera ariba e proposicion di gobierno pa wak unda e siguiente stap ta.

“Na final di dia tur cos cu nos como sindicato ta haci ta pa e beneficio di e miembronan y e clase trahado. Esey ta e punto di salida di tur sindicato y mi ta kere despues cu nos a caba di manda un carta pa gobierno e ta mustra duidelijk cu e sindicatonan cu a firma e carta aki di dia 25 di november ta riba e mesun liña y nos a mustra gobierno kico ta nos punto di bista pa locual ta e proposicion cu a bin dilanti durante e reunion”, Sr. Maduro a bisa.

Pa locual ta trata e comision, Maduro a indica cu e sindicatonan bisa gobierno cu na prome luga nan ta contento cu sikiera nan a bin cu e proposicion di e comision, aunke e ta un aña laat pasobra esey lo mester a bin, segun Maduro for di aña pasa caba pa negosha e parti di recorte. “Nos ta bisa cu e recorte di 12.6% mester stop per direct y per direct nos kiermen per 1 di december 2021. Esey ta un di e prome condicionnan cu nos a pone ariba papel pa gobierno”, el a agrega.

Maduro a indica tambe, contestando e pregunta tocante e comision cu gobierno kier forma, cu hopi biaha comisionnan ta wordo forma y hopi biaha tin e pensamento su tras cu ta solamente pa alarga e situacion, pa motibo ey e sindicatonan a pone den e carta cu nan a caba di manda gobierno cu e punto cardinal ta cu mester stop e 12.6% entrante 1 di december 2021 pa asina nos por sigui negosha ariba un base mas trankil y pa nan por keda cla y yega na un solucion y consenso entre gobierno y e sindicatonan.

Sr. Maduro a remarca tambe cu den e carta nan ta bisa cu e 50% cu ta wordo reteni di e bonus di e pensionadonan pa fin di aña mester wordo paga back per 1 di december di e aña aki y tambe ta conta mescos pa e companianan estatal cu ta reteniendo e 12.6% y tambe e otro e organisacionnan.

E sindicatonan a bisa gobierno, pa locual ta trata e comision, cu despues cu gobierno bay di acuerdo cu e prome punto, nan lo bay di acuerdo cu e comision tambe, pero enfatisando cu e comision aki lo consisti solamente di sindicatonan cu a firma e manifiesto di dia 25 di november ultimo.

“Pakico nos ta bisa e sindicatonan cu a firma e carta aki so, pasobra ta como si fuera cu e sindicatonan cu no a firma e carta aki, di nan parti nan ta di acuerdo cu e recorte di 12.6% y pa e motibo ey nos ta di opinion cu ora cu bay negosha pa elimina e 12.6% aki e sindicatonan cu a para conforme e deseo di e miembronan so por ta den e negociacion”, Maduro a splica.

Pa loke ta trata e carta cu e sindicatonan a entrega recientemente na gobierno, Sr. Maduro a indica cu e sindicatonan a informa gobierno cu nan kier ricibi un contesta ariba e carta aki mas tarda dia 3 di december pa 5or di atardi, mirando cu ariba e dia aki tin Ministerraad y nan a pidi gobierno pa atende e carta aki den ministerraad pa asina nan por ricibi un contesta pa defini den ki forma nan lo sigui bay dilanti.

Maduro a remarca cu diaranson, despues di e reunion, algun asunto a wordo saca for di contexto den algun medio di prensa pasobra nan a bisa claramente cu nan lo discuti algun punto internamente y e sindicatonan ta para semper pa e miembronan y locual cu e miembronan desea nan ta haci.

“Nos tin cu wak bon ora cu duna cierto informacionnan pa duna e informacion corecto pa asina no trece discordia of duda den locual ta e trabou cu sindicatonan ta haciendo. E ta duidelijk cu desde cuminsamento di aña pasa caba nos a indica cu locual gobierno a haci ta inhusto pa retene e 12.6% di forma unilateral, ad hoc, sin consulta niun dia cu e sindicatonan”, el a agrega.