Sindicatonan malcontento pa maneho nobo di overtime cu por trece consecuencia

Ayera mainta den un conferencia di prensa, diferente sindicato a uni pa expresa nan malcontento pa cu e maneho cu gobierno a introduci siman pasa tocante overtime, cual nan ta considera cu ta un maneho “iresponsabel”.

Edward Maduro, presidente di sindicato di Aduana (SADA) a splica cu na e momentonan aki overtime ta na un nivel bastante halto pa motibo cu tin scarsedad di trahadonan, y cu e maneho nobo aki a wordo firma dia 14 di september ultimo y mester a drenta na vigor un dia despues.

“Tristo pa bisa ta cu e maneho aki ta bay cuminsa na vigor dia 15 y e mesun dia den oranan di merdia e dienstnan a hay’e den nan poder. E ora ey nan a haya sa di e maneho aki pa compartie cu otro departamentonan cu ta resorta bao di nan”, el a sigura.

Esaki ta cosnan cu mester wordo discuti na mesa, segun Maduro a señala, pero cu ora ta trata di cosnan cu ta hopi fastioso pa discuti riba nan, gobierno ta tuma e decision “sin acerca sindicato pa nos por carga un tipo di maneho asina”.

Maduro a expresa cu den e maneho gobierno ta hunga cu sentimento di e trahadonan, unda nan ta indica cu nan a duna e ambtenaarnan e 5% back di salario y cu aworaki pa via di esey gobierno mester presenta un maneho di e tipo aki pa overtime.

“Berdad e ambtenaarnan a haya nan 5% back den nan salario, pero gobierno mes ta bisa cu esaki ta presupuesta caba pa e aña aki cu 18 miyon florin. Kiermen tabatin 18 miyon presupuesta cu gobierno kier a duna e 5% aki di januari caba, pero manera nos tur sa, ta na juli gobierno a cuminsa paga back e 5 % unda cu pa e restante di aña gobierno lo a usa alrededor di 8 miyon di locual ta presupuesta cu ta 18 miyon pa e 5%. Nos no ta compronde con gobierno por bin insinua cu aworaki e tin cu bin cu un maneho riba overtime pasobra no tin placa pa por cubri e 5%. Esaki ta cosnan cu nos ta lamenta, e manera di procede di gobierno ”, el a bisa.

Nan ta puntra kico ta wordo haci cu e resto di placa cu a presupuesta pa e pago di 5% adicional riba salario, ya cu ta considera cu eynan tin un discrepancia con gobierno ta maneha placa di pueblo.

Tambe, den e maneho ta papia cu pa executive dienst por traha te un maximo di 40 ora di overtime pa luna y unabes cu ta pasa esaki, e ta bay back na time back. “Logicamente tur hende cu por usa un poco di sentido comubn lo sa cu esaki ta bay crea un otro buraco mas, pasobra ya caba ta existi un escasez grandi den personal di tur dienst como aduana, polis, KIA, migracion, Brandweer”, Maduro a afirma.

Na comienso di e aña aki, e sindicatonan a bisa gobierno cu si acaso no tin fondo pa paga 5% pa duna time back. “Nos ta bisa ban duna nos back e 5% den ora, te ora cu yega e momento pa paga e 5% cu placa. Pero e tempo ey gobierno a bisa no por, pasobra e ta bay crea overtime, y aworaki diripiente si por. Mi no ta compronde e manera cu gobierno ta maneha”, Maduro a expresa.

E ta un topico cu gobierno ta conoce segun el a sigura, pa motibo cu nan a yega di papa di dje caba, unda cu sindicatonan a indica cu no ta falta di e trahadonan pero mas bien ta falta di e maneho mes di gobierno.

Sindicato di Polis di Aruba: “No por garantisa e seguridad di pais Aruba”

Di su parti, sindicato di Cuerpo di Polis di Aruba y su vice-presidente Roland Maduro a mustra preocupacion pa cu esaki, pa motibo cu polis no ta hayando nan salario completo. Nan tin mas cu dos aña entregando 12.6% di nan salario, tin scarsedad di personal “y tampoco nos no tin cuminda na cas pa nos famia”, el a sigura.

Pa e motibonan ey nan ta sigura cu nan ta bringando pa nan derecho. Gobierno a debolbe 5% riba di salario, pero ainda ta falta 7.6%. “Si nos papia cla y raspa, a kita 12.6% for di nos y nos famia sin un rato puntra con nos por sobrevivi cu esaki, cu menos presupuesto den nos cartera. Esaki ta un falta di respet pa nos y pa nos pueblo”, el a afirma.

Maduro tambe ta enfatisa cu turismo ta e pilar di Aruba, pero turista no ta bin pa e beachnan, pa motibo cu otro parti di mundo tambe tin beach cu santo blanco. “Turista ta bin akinan pasobra nan ta sinti sigur, pasobra tin visibilidad di polis tur caminda. Pero door cu no tin suficiente polis pa traha manera mester ta, ta surpasa e overtime. Nos mester sacrifica nos famia y nos sernan keri pa traha. Si no tin overtime bo turismo por collapse y cay den otro. Sspera gobierno ta carga cu e consecuencianan aki”, el a comenta.

Di su parti, presidente di e sindicato aki, Robby Solognier a specifica cu nan no ta bringando e punto pa nan gana overtime. Tin consecuencianan drastico tras di esaki ya cu no tin suficiente personal pa por sali pa duna asistencia. El a bisa cu gobierno ta tuma decision sin consulta sindicato y sin sa cua ta e miho manera pa resolve e situacion. Nan ta compronde a pesar cu nan ta keda bringa pa nan derecho, y “aworaki ta bin cu e situacion di overtime, mañan nos no por garantisa e seguridad di pais Aruba”, el a bisa.

Alonso Tromp di sindicato di Trahadonan Organisa di Sector Publico di Aruba (TOPA) a expresa cu nan tambe ta solidario cu e otro sindicatonan. El a pone enfasis riba e parti di salud di e miembronan. “Ta lubida cu overtime ta facil pa bisa cu mi ta gana un tiki placa of dianan liber, pero e salud di nos miembronan aworaki tin un problema grandi na Aruba despues di Covid-19, cu ta salud mental.” Den sentido aki, Tromp a bisa cu nan ta poniendo hopi enfasis riba salud mental, unda trahadonan ta hayando hopi stress cu despues por haya problemanan fisico y door di esey AZV ta bay confronta mas problema financiero. P’esey nan ta considera importante pa sinta conhuntamente cu gobierno y nan miembronan pa zorg pa bin cu un solucion.

Nan a bisa cu nan ta spera pa gobierno por rectifica y cu sindicatonan ta keda habri pa yega na mesa na otro un biaha mas.