Sindicatonan SIMAR, SPA y SADA a reuni pa ofrece un conferencia di prensa despues di un reunion entre nan pa informa cu nan a yega na e decision pa yama un reunion extraordinario awe, diabierna.
Edward Maduro di SADA a splica cu salario di ambtenaarnan desde luna di mey a wordo reduci door di gobierno relaciona cu e pandemia di Covid-19 y loke nan kier ta pa wak si nan por haya un posibel compensacion pa cu esaki. Ademas el a bisa cu durante un ultimo reunion cu nan a tene cu gobierno, dia 17 di juni ultimo cu minister president, el a indica cu sindicatonan lo haya un yamada di gobierno pa asina informa nan kico lo ta e posibel compensacion pa cu e salario cu ambtenaar ta entregando y tambe e 7.6 – cu ta representa e 50% riba e primanan di november, augustus, di vakantie uitkering, total e ta suma 12.6 pa aña.
Tambe el a informa cu nan a entrega un carta pa gobierno dia 22 di october pa haya sa kico ta e pasonan eventual si tin manera pa compensa nan si of no, y mirando e preocupacion cu basta di nan miembronan tin, pero cu te ainda nan no a haya contesta, algo cu Maduro ta considera como un falta di respet.
Tambe el a comenta cu nan a manda un otro carta pa gobierno dia 30 di october, pa motibo cu pa nan un reunion ta di vital importancia pa haya sa kico ta bay pasa cu e reduccion di salario di 2020 y loke lo pasa pa aña 2021, cu segun el a sigura, aña nobo ta yegando y nan kier un clarificacion di gobierno.
Di esaki, el a expresa cu nan a haya un contesta di parti di gobierno dia 30 di october, den cual a informa cu te awor sindicatonan no por wordo invita na un reunion mirando cu nan no a keda cla cu presupuesto y no por ofrece ningun informacion pa locual sindicatonan ta pidiendo.
