Trahadonan ta rechasa e ponencia cu no por para e reduccion di salario di 12.6 porciento. Asina Raymond Maduro di sindicato ALVAST a bisa.
Sindicatonan ALVAST, hunto cu STA y UEA a reuni diaranson cu Director y mediador di Gobierno riba e disgusto cu a lanta pa motibo cu a corta 12.6 porciento di salario sin aprobacion di e trahadonan.
Despues di e reunion diaranson, gerencia di Elmar a tuma contacto ayera cu Utilities NV y tambe cu Hunta di Directiva y comisarionan di Elmar pa informa nan di e posicion di e trahadonan. Esta cu pa medio di e sindicatonan, a propone pa para e reduccion pa mas tarda diaranson 5 or di atardi. Tambe tabata kier pa saca un memo pa informa tur trahado cu lo stop e reduccion, pa asina por reina paz y trankilidad atrobe den e compania.
Pero gerencia di Elmar a notifica Sr. Maduro di ALVAST cu e no por cumpli cu e peticion di e sindicato. “El a informa mi cu sindicatonan ta liber pa trece proposicionnan dilanti den cuadro di un eventual negociacion,” Maduro a bisa. “Mi a puntra e Director ta di con awor a bin cu e proposicion ey? Di con a kita prome e 12,6%?”
Segun Raymond Maduro di ALVAST, Gerencia nunca a bin cu ningun proposicion y a prefera di kita e porcentahe di salario sin cu tabatin autorisacion pa haci esey. “A tuma e decision aki di un banda so. Nos a keda para riba nos punto di salida, cu si no ta hala e decision cu gerencia a tuma , cu sindicato nan lo pone gerencia responsabel pa accion, cu posiblemente lo por escala.”
Mediador di Gobierno a bisa di lo manda un carta pa Utilities pa informa nan di e posicion di sindicatonan. Mediado a purba na tur manera pa sinta na mesa pa wak si por yega na un solucion. “No ta keda ALVAST di bay abogado pa wak si por entama un caso, pa asina forsa gerencia hala aden e decision tuma riba su mes, si cu e tabatin autorisacion pa kita e 12.6 porciento di salario di trahadonan di Elmar.”
