Sindicatonan ta skirbi un carta habri dirigi na Gobierno unda cu ta impone un ultimatum pa Gobierno cumpli cu e exigencianan cu nan a trece dilanti.
Anteriormente e aña aki Gobierno a reduci salario di trahadonan cu un 12.6%, acto cual segun e carta skirbi pa e sindicatonan ta “contra ley, contra nos Democracia y ta nifica tambe un preludio di Dictadura.”
E grupo ta consisti di 11 sindicato y 2 organisacion cu a tuma nota cu placa di empleadonan publico, placa di trahado di companianan estatal y placa di fundacion no ta bay destina mas como parti di solidaridad na e grupo di trahadonan cu a perde trabao of pa yuda mantene cupo di trabao di algun.
Ya caba e grupo aki a informa Gobierno tocante e peticion di para inmediatamente e recorte di 12.6% di e entrada di tur e trahadonan cu ta sacrifica.
Segun e carta, Gobierno a propone un comision, cu ken nan lo papia y hunto haci negociacion cu Hulanda cual a keda rechasa pa e sindicatonan. Aunke cu recientemente tabatin varios accion pa demostra malcontento pa motibo cu Gobierno kier retene 12.6% di e entrada y defende e posicion di e 11 sindicato y 2 organisacion, nan ta sigui dispuesto pa dialoga y sinta hunto na mesa pa yega na un acuerdo.
Pa e dialogo aki por tuma luga, e sindicatonan ta pidi pa tene cuenta cu e condicionnan cu anteriormente a ser poni, pues di revoca inmediatamente e 12.6% y reinstitui inmediatamente e gelijkbedrag di e pensionadonan.
Cu e carta aki e sindicatonan ta enfatisa cu nan ta exigi gobierno pa para inmediatamente e dialogo cu sindicatonan minoritario cu ta tumando luga tocante e tema, y ta urgi Gobierno reconsidera su posicion tocante e eliminacion di e recorte di salario.
Alabes, e sindicato ta informa Gobierno cu nan kier un confirmacion di esaki no mas tarda cu diabierna 10 di december pa 12or di merdia, cual lo evita cu e accion lo escala.
