Despues cu un carta di Sindicato SIWA, cu tabata trata di Fondo di Solidaridad pa FASE a leak pa medionan di comunicacion, esey a causa conmocion pa otro sindicatonan di Aruba. Siete di nan cu ta representa empleadonan publico y empleadonan di diferente sector a uni y a dicidi di ofrece un conferencia di prensa pa asina trece nan puntonan dilanti pa cu esaki.

Edward Maduro, presidente di Sindicato di Aduana (SADA), a splica cu locual a bin dilanti relaciona cu e carta menciona, pa nan ta algo “cu a causa sorpresa.” Y no den sentido cu nan ta condena e actitud den caso aki cu ta SIWA, sino tur loke ta su tras, cu nan como sindicato no tabata sa.

“Nos ta hopi contento con SIWA a atende e caso aki, pasobra nan a trece algo na claridad, cu nos a pensa cu lo no por pasa ora cu nos ta scucha un minister presidente cu a bisa cu tur hende mester ta solidario y tur hende mester entrega den caso cu Hulanda no ta bay yuda”, Maduro a señala.

Segun Maduro, SIWA a trece un claridad unda cu esaki no ta cuadra cu realidad. Ademas el a bisa cu siman pasa nan a haya un reunion cu Conseho di Minister y minister presidente, cu segun Maduro a bisa, ainda ta falta pa paga empresanan estatal. Y si en dado caso no ta bay di acuerdo pa sigui entrega “tot nadere order” lo tin un problema pa locual Hulanda ta yudando cune.

“Akinan minister presidente no tabata sincero cu nos na mesa na e momento ey, pasobra nan tabata sa cu tabatin companianan estatal cu no tabata pasa esey pa fondo di FASE, locual tabata retene door di e doño di trabou,” Maduro a sigura.

Tambe el a comenta cu tin situacionnan na unda placa no tabata reteni mes y ademas otro na unda e placa a perde. Por ehemplo Serlimar, cu su trahadonan a bisa cu nan placa a wordo reteni, pero den un lista cu a leak ayera pa medionan di comunicacion [red: riba pagina 7 di edicion aki di Bon Dia Aruba] por a mira cu nan no a pasa esey pa fondo di FASE.

Di e manera aki, Maduro a indica cu ta p’esey cu nan a haci un reunion ‘relampago’ entre sindicatonan pa wak cua ta nan proximo paso. Igualmente el a afirma cu a skirbi un carta cu un peticion pa minister presidente y otro ministernan pa un reunion cu caracter di urgencia, “no un reunion cu nos a warda tres of cuatro siman den pasado,” pa asina nan haya claridad y tur e realidad riba mesa poni.

“Nos no por sigui bay den situacion unda cu tin cu entrega y ta solidario, pero loke ta wordo reteni no ta yega na su destino”, Maduro a specifica.

Ademas di sindicato SADA, tambe tabata presente sindicato di Maestro (SIMAR), sindicato di Polis (SPA), Federacion di Trahadonan di Aruba (FTA) y sindicato di Empleadonan Publico y Priva di Aruba (SEPPA), ademas di Trahadonan Organisa di Sector Publico di Aruba (TOPPA) y sindicato di Trahadonan Arubano (STA), cu tambe a duna nan apoyo y ta di acuerdo cu locual Maduro a trece dilanti.

A pesar cu tin representacion di sindicato di trahado di aparato publico, nan ta bay realisa un reunion cu otro sindicatonan di compania estatal tambe, pa motibo cu esaki no ta un situacion di lo sigui entrega, sino cu e situacion cu ta tumando luga no ta corecto, Maduro a expresa.

Pa finalisa, Maduro a manifesta cu loke nan kier ta pa nan haya sa ta e berdad di kico ta pasando den parti di Gobierno cu e situacion di solidaridad aki.

Di otro banda, minuutnan despues minister di Finanzas, Cultura y Asuntonan Economico, Xiomara Maduro a duna un conferencia di prensa pa trece dilanti un aclaracion di loke sindicatonan a bisa durante nan conferencia di prensa.

Primeramente, minister Maduro a señala cu ayera atardi el a sinta na mesa cu sindicato SIWA y tambe cu sr. Luis Oduber, CEO di WEB Aruba N.V na unda el a aclaria e situacion tocante e carta cu tin di haber cu Fondo di Solidaridad pa FASE.

Ademas, minister Maduro a sigura cu pa Aruba por haya e ayudo for di Hulanda desde e di dos tranche cu a wordo ricibi na juni, un di e condicionnan tabata ta cu mester por a corta, cu Aruba mester a mustra di ta solidario cu otro.

Pa e motibo aki, minister presidente y minister Maduro a manda un carta pa tur e companianan estatal pa asina pidi nan pa Aruba por cumpli como pais cu e condicionnan di Hulanda, esta di salarionan cu mester wordo corta.

Como Gobierno nan a pidi pa e sumanan aki di salario cu a wordo corta pa esey por pasa na un fondo special, un cuenta special na Banco Central di Aruba pa asina e por sirbi como aporte pa por paga pa esunnan cu a wordo afecta mas severamente pa e crisis di Covid-19.

Di esaki, binti compania entre nan Setar, WEB, Elmar, Refineria di Aruba, Terminal di Energia di Aruba, Compania Arubano di Petroleo entre otronan, segun loke minister Maduro a menciona “tur di nan a corta manera cu e condicion di Hulanda ta stipula”.

Pa e motibo aki minister Maduro a expresa cu nan por haya e fondonan pa e di dos y di tres tranche loke ta nifica tambe cu pa e proximo tranche esey lo ta keda riba mesa te cu despues lo tuma un otro decision.

Shete di e companianan aki a pone placa den e fondo aki pa FASE y esun cu no a haci esey a duna e ora ey un splicacion dicon, e splicacion tabatin di haber cu e situacion di e companianan mes pa loke ta trata cash flow, minister a enfatisa.

“No ta asina aki cu nan no ta solidario, nan muestra ta cu nan a cumpli cu e condicion cu Hulanda a pidi pa ta solidario na Aruba, algun di nan a corta mas di loke a wordo pidi…” minister Maduro a finalisa.