Ayera mainta varios sindicato como SEPPA, SIMAR, SADA, FTA, TOPA, SPA a uni pa entrega un peticion na Conseho di Minister, unda nan hiba un carta na prome minister Evelyn Wever-Croes pa asina solicita un reunion lo mas pronto posibel, cu fecha mas tarda diabierna awor, dia 3 di maart.

Di esaki, Edward Maduro, presidente di Sindicato di Aduana (SADA) a splica cu e peticion di e carta aki ta tocante e prestatiemanagement cu Gobierno di Aruba a introduci 1 di januari ultimo. Maduro a señala cu tabatin varios reunion cu gobierno ademas di conferencianan di prensa di sindicato, y cu e ultimo reunion cu gobierno tabata dia 27 di januari.

“Desde e dia ey te dia di awe nada concreto no a tuma luga di parti di gobierno, a pesar cu nos a señala tur e preocupacionnan pa locual ta trata e ley akinan; unda cu nos a bisa cu e ley aki ta devastador pa e ambtenaar y respecto den ki funcion bo ta. Bo por ta e ambtenaar cu ta den e posicion mas halto di gobierno como director te cu esun cu tin scala mas abao, pero e ta conta pa tur hende,” Maduro a sigura.

El a expresa cu di nan banda si nan a keda reuni internamente pa palabra y haci tur e trabaonan necesario pa nan mustra gobierno cu e ley aki pa nan ta devastador y “no tin un otro opcion cu trek in e ley aki,” el a bisa.

Manera nan a señala den un conferencia na januari ultimo, nan ta di opinion cu e ley aki tin “hopi cos cu ta bin cune, entre otro e ARBOwet, pero tur esakinan ta den e lachi warda ainda. Pero si bo kier bin cu un ley unda cu na un manera hopi facil bo ta yega pa kita hende, a pesar cu gobierno tin un carta cu ta bisa cu aña 2023 ta bay ta un aña di transicion, pero den e ley esey no ta poni,” Maduro a bisa.

Pa nan ta hopi importante e deadline cu nan a pone pa Conseho di Minister actua apenas ta diabierna awor y pa e motibo ey nan a bisa na prome minister ayera cu nan ta na haltura cu e fecha ta eynan mes, pero “esey ta danki na e gobierno mes, pasobra gobierno no a haci nada erover. Nan a sinta cu nos na januari na unda nos a splica tur nos puntonan y pone tur cos duidelijk riba mesa, pero di banda di gobierno nada concreto no a wordo haci. Solamente dos carta dos carta a wordo manda, pero eseynan no tabata nada concreto y pa e motibo ey nos a bisa minister cu e menasanan na pia di trabou ta siguiendo,” el a señala.

E punto principal ta cu den e ley aki nan ta para riba e “ingetrokken” pa asina nan por sigui delibera na mesa cu gobierno.

Na januari ultimo, mediante un conferencia di prensa, sindicatonan a expresa nan opinion riba e decision di gobierno di introduci un ‘Prestatiemanagement-systeem’ na unda nan a sigura cu esaki ta hancra den decreto nacional AB2022 number 165, pero mester introduci esaki di un manera responsabel.

E dia ey, Maduro a señala cu na final di aña 2022 a pasa un LBham unda cu a bay implementa un ‘prestatiemanagement-systeem’ unda cu for di aña 2021 nan ta bin reuniendo cu gobierno y Departamento di Recurso Humando (DRH) tocante esaki; pero sindicatonan ta considera cu e manera con kier trece esaki ta algo cu nan como sindicato no por acepta, “pasobra e ta bay tin repercusion tanto pa miembro y no miembronan di sindicato”, Maduro a bisa.

Pa e motibo aki, sindicatonan den varios ocasion a pidi gobierno pa wanta un rato e implementacion di esaki pa motibo cu nan ta opina cu “esaki no kiermen cu nos ta contra su implementacion sino cu e ta trece cune cierto cosnan peligroso pa e trahado,” el a sigura.

Den e puntonan importante di e landsbesluit aki, Maduro a señala cu e parti di ontslag di un ambtenaar den nan concepto a bira mas facil pa gobierno haci uso of “haci mal uso di dje.”

Nan a sinta cu DRH riba e asunto aki manera Maduro a menciona, pero esey no ta nifica cu sindicatonan tabata di acuerdo, cu logicamente ora kier yega na un consenso den un tipo di landsbesluit asina importante y grandi pa futuro loke nan kier haci ta pa trece tur e punto dilanti y trahadonan keda salvaguardia.

Ora landspaket a bin na vigor cu mester bin un prestatiemanagement pa nan como Cuerpo di Aduana y pa Polis, ta algo cu no ta mucho nobo pa nan segun Maduro a declara, pa motibo cu ya caba nan tin un den nan positionele bepaling. Pero aworaki a bin otro puntonan cu a wordo introduci den e ley aki cu ta “hopi leu di cas compara cu loke nos tin caba y p’esey ora mi a wak na final di e ley den e parti di Aduana, Polis y Bombero ta wordo ingetrok.”

Ademas, el a declara cu un prestatiemanagement ta habri man pa gobierno haci mal uso di esaki unda cu directornan no ta wordo afecta sino empleadonan chikito so.

Nota di redaccion:
 Mirando e tamaño y eficiencia di e aparato publico den contexto di e situacion financiero di Pais Aruba, por nota e urgencia di bin cu un reforma pa e manera con ta evalua e necesidad di contribucion y e prestacion di cada ambtenaar. E ley di Prestatiemanagement ta adresa esaki den un manera. Ta keda awo na gobierno pa splica esaki debidamente.

No tabatin un cambio di ley, solamente un decreto a base di LMA, e ley organico pa conducta y evaluacion di empleado publico. Gobierno ta keda responsable pa ehecucion debido den tur departamento, loke ta bay ta un trabao inmenso pasobra salvo algun excepcion, e aparato no ta conoce un evaluacion dos biaha pa aña, loke ta standard den companianan grandi. Por fin gobierno ta adopta norma di evaluacion normal den sector priva y na paisnan desaroya tambe den nan sector publico.