Sindicato di trahadonan Vereniging van Werknemers met een Individuele Arbeidsovereenkomst In Dienst van WEB NV (VWI) a vocifera nan mal contento ariba e hecho cu ainda no tin un sentencia den e caso di apelacion riba un sentencia di caso un sumario cu a tuma luga na maart di 2021.

A traves di un comunicado, e sindicato a indica cu dia 31 di october 2023, Corte Comun di Aruba, Corsow y St. Maarten a pone un biaha mas riba e rol di Corte e anuncio cu lo duna uitspraak di e vonnis di e caso den Hoger Beroep cual VWI a entama mustrando asina VWI su desacuerdo pa cu e uitspraak di e Kort Geding .

Corte Comun, un biaha mas, pospone e uitspraak di e caso den Hoger Beroep te cu proximo

aviso. E sindicato a señala cu dia 30 di mei 2023 a sali den diferente medio di comunicacion un declaracion di presidente di Corte Comun di Aruba, Corsow y St. Maarten, Mauritz de Kort, bisando: “Ora cu e caso a wordo traspasa di Aruba pa bay pa e combinacion di apelacion, esta e tres huesnan na Corsow, e traspaso no a bay bon, pues nos a perde e caso for di bista.”

E sindicato a sigui indica cu dia 5 di juni 2023 VWI a manda un carta pa sr. de Kort puntrando kico precies a bay robes cu e traspaso di e caso di Hoger Beroep y puntrando tambe kico ta e situacion e tempo.

Dia 5 di juli 2023 VWI a haña contesta riba e carta, pero segun e sindicato, e contesta no tabata bisa practicamente nada

“VWI ta keda para ariba cu husticia no a wordo sirbi cu e uitspraak cu mr. Keltjens a duna pa cu

e Kort Geding cu VWI a entama contra WEB pa cu e inkorting ilicito di 12.6% di salario na aña 2021. Tur hende cu conocimento di Aruba su leynan kende VWI a consulta a bisa VWI practicamente e mes un cos: e uitspraak di mr. Keltjens di dia 10 di maart 2021 ta ‘kort door de bocht’ y no ta conforme ley,” e sindicato a remarca.

Corte Comun a postpone e uitspraak di e veredicto di e caso den Hoger Beroep entama pa VWI mas cu cinco biaha caba. E sindicato tin dos aña y shete luna wardando riba e uitspraak, pero ta keda optimista cu husticia lo prevalece y cu e uitspraak di e Hoger Beroep lo ta den

VWI su fabor.