Sindicato UPA (Union Portuario Arubano) a expresa su disgusto riba e forma con ASTEC ta implementa abuso riba nan trahadonan, ya cu e compania ta mira ‘hancho pa nan y smal pa nos’.
Dirigentenan di UPA no ta descarta un accion na cualkier momento riba e barconan cu ta bini for di Miami.
A pesar cu UPA no ta mayoria riba waf, nan ta spera un union entre e trahadonan bek, ya cu e malcontento ta continua. Esaki a pesar cu actualmente sindicato STA ta representa e mayoria di e trahadonan. Recientemente presidente di STA, Diego de Cuba a anuncia cu lo bini cu un union sindical entre trahadonan di ASTEC y trahadonan di APA cu nan ta representando, ya cu nan ta trahadonan di waf. STA ta presiona pa negosha un contracto colectivo (CAO) nobo cu gerencia di ASTEC.
UPA a laga sa cu e accion cu nan tin pensa di bin cu ne, no tin nada di haber cu STA. E ta un accion organisa riba nan mes, ya cu ‘e problema ta cu sr. de Cuba a pega barco riba waf. E no por saca su curpa’. Segun UPA ya tin miembronan cu a cuminsa bandona STA caba, y nan a cuminsa haya varios carta di retiro for di STA.
A pesar cu UPA ta representa un grupo di e trahadonan di ASTEC, nan no a wordo invita pa sinta negosha CAO. Pero nan a laga sa cu nan a bay mesa cuater biaha caba cu ASTEC. P’esey nan no ta descarta cu lo bin un accion riba waf.
