Union Sindical Aruba (USA) ta un unidad sindical di cual mas o menos 13 sindicato a yega hunto pa asina cuminsa bringa pa un solo meta. Hopi hende tabata en espera di e reunion, segun Sr. Hubert Dirksz president di FTA. Te cu awor nan a logra reuni dos biaha, di cual e prome reunion 9 sindicato a presenta despues 12 sindicato. Pero 13 a bisa di ta forma parti di e union aki, aunke cu ainda falta 3 pa confirma pa asina tur traha hunto y sali na defensa di e clase trahado. Sr. Dirksz a reuni cu Minister Plasterk pidiendo pa nan sinta hunto pa trata diferente punto.
Mirando e cantidad di problemanan cu ta andando na Aruba, specialmente e parti financiero di Aruba caminda medidanan a wordo tuma y mas medida ta na caminda. E union sindical a wordo acelera. A presenta un situacion caminda gobierno, Minister di Labor, despues di a reuni na nivel di Tripartiet entre gremio comercial y sindical, a dicidi pa continua di aboli e ley 1613X for di e codigo civil.
Traha hunto
Esey a haci cu a dicidi di reuni pa forma un union, den e caso aki FTA a haya apoyo total di tur sindicato, cu a yuda tambe pa e union aki a wordo realisa. Ya caba tin un nomber cual ta Union Sindical Aruba (USA) cu ta un nomber conoci, pero pa no poni nombernan di den pasado a opta pa esaki. E intencion ta pa nan traha fuerte, traha berdad den un union cu bon comprondemento, segun Sr. Dirksz.
Kisas esaki no ta facil, pero mirando e retonan, e responsabilidad cu tin ta mas grandi cu cada un di e sindicatonan ta haci necesario pa nan traha hunto. E sindicatonan cu ta forma actualmente hunto den e USA ta TOPA, FTA, SIMAR, IOWA, ALVAST, WA, SCT, SEPPA, ABV, SADA, SCCA, SIWA y SPA. Durante e reunion di ayera, no ta tur por a presenta pa diferente motibo, Sr. Dirksz a indica. Nan tin e compromiso di cada un pa traha hunto y e idea ta pa bini hunto confirma riba reglanan con pa nan funciona y sigur pa nan por cuminsa prepara pa e trabounan cu tin na caminda.
Reuni cu Plasterk
E prome informacion cu tin di duna pasobra hopi hende lo puntra, segun Sr. Dirksz, ta cu a reuni cu un grupo di representante di diferente organisacion hunto cu Minister Plasterk, VNO y otro representantenan di Hulanda. A discuti den un forma informal kico ta e sindicato su posicion, kico nan ta pensa, kico ta e solucion, kico nan ta mira di e situacion, e perspectiva principalmente economico di pais Aruba.
“Den liñanan grandi nos por bisa cu e situacion ta dificil. Tardi of trempan e decisionnan mester wordo tuma sigur pa no haci daño ni na e sector empresarial, ni na nos economia, tampoco e poder di compra di e clase trahado,” e ta indica. Esaki lo mester discuti na nivel sindical mas profundo. Esaki ta pa motibo cu ya nan tin un reunion confirma cu VNO pa reuni cu representante di Hulanda pa e Islanan di Antias aki na Aruba.
Union Sindical Aruba lo prepara nan mes y lo reuni pa e ora ey nan lo tende e bos, e opinion di tur sindicato. “Mi ta spera cu nos contribucion como union lo resalta pa asina nos hiba e pais aki na un miho direccion y no solamente sali na derecho di e clase trahado,” e ta indica. A manda un carta haciendo un solicitud pa reuni cu Minister Plasterk. E sindicato FTA a ricibi confirmacion cu e reunion lo bay tuma luga, pero USA ainda no a presenta e exigencianan of kico nan lo spera di gobierno di Aruba, cu Hulanda.
Yega na balans
E pregunta ta bin con nan ta bay bende Hulanda tur cos cu ta pasando den e sector priva y publico, pasobra Hulanda lo mester bay evalua. Segun Sr. Dirksz, nan como sindicato mester yega na un entendimento prome, yega na un balans, tambe cu e exigencianan. Nan sa cu sector priva tin su problemanan, su situacionnan, sector publico tambe. Pero ideal lo ta cu lo bay tin un nivel similar. Si cualkier situacion presenta, no lo bay tin ningun discriminacion pa ningun grupo di trahado, ni sector priva ni sector publico.
Cada sector tin su ley, di cual nan no ta riba mesun linea. Sr. Dirksz a bisa cu cada un tin nan derecho y tur mester wordo proteha mescos. Ley pa sector publico ta pa e sector aki, mientras cu ley di sector priva ta pa sector priva. Loke mester yega na dje akinan y cu ta papia di un Aruba. Sindicato sa cu esaki ta dificil di papia, pero por ehempel si ta papia di reduci aparatonan gubernamental, esaki ta algo cu no lo sosode asina no mas. Ainda tin cosnan cu sindicatonan mester atende cu otro na e nivel di sindicato.
Diferente problema
Como cu tin diferente sindicato, cada un ta trata diferente problema. Incluso cada sindicato por tin miembronan di diferente compania. Cada sindicato ta trata riba diferente punto y mester sa si pa yega na e nivel cu sindicatonan ta desea si lo trata specificamente problemanan economico of otronan cu tin. “E ta logico cu nos tin di bay atende cu tur problemanan,” Sr. Dirksz ta indica. Sindicatonan cu tin miembronan cu ta traha den mes compania of departamento por sinta hunto, comparti informacion y por ta mas fuerte pa atende cu e derechonan di e trahadonan, e ta bisa. Esaki ta pa sali dilanti no solamente pa mehora e situacion sino cu e echo pa e trahado mes no wordo perhudica.
