ORANJESTAD – E sindicato di empleadonan publico, TOPA tambe a adopta e mesun posicion di otro sindicato, di abstene di participa directamente na e manifestacion convoca pa partido AVP pa dia 12 di april awor. Como sindicato, nan ta distancia nan mes di cualkier accion promovi politicamente, pero esaki no ta kita cu nan miembronan tin e pleno libertad di participa den dje.
Presidente di TOPA, Rene Bernabela, a declara na Bon Dia Aruba cu nan ta representa nan miembronan cu ta trahando den aparato publico, y tambe den empresa estatal di gobierno. “Nos di nos banda no ta involucra nos mes riba aspecto politico,” el a bisa na e matutino aki.
El a laga sa cu TOPA, como sindicato, ta limita nan mes solamente na trabou sindical. P’esey nan no lo por ta participa na tipo di manifestacion di e caracter di esun cu partido AVP ta organisando.
Na ta laga e asunto aki na discrecion na cada partido politico cu kier organisa nan manifestacion riba nan responsabilidad. Libremente e miembronan afilia na TOPA tin nan derecho di participa. Pero e sindicalista Bernabela a afirma cu pa loke ta trata sindicato TOPA riba su mes participando den e manifestacion absolutamente esaki no ta bay ta e caso.
