Siman pasa sindicato TOPA a ten eun rueda di prensa, den cual nan a duna nan opinion encuanto e caso di e director di Directie Volksgezondheid (DVG), cu a gana su caso den corte y por lo tanto, a base di veredicto di hues, por a bolbe na su puesto na e departamento menciona.
Como e sindicato cu a hiba accion fuerte contra e director, a expresa un biaha mas nan desacuerdo cu e regreso di e director, entre otro pasobra no por lubida kico a pasa anteriormente, y ademas cu e caso gana pa e director lo tabata meramente ‘un technicality’ segun e sindicato.
E sindicato tabata desea di haya claridad di banda di e ministro concerni, e mandatario di e.o. Salubridad Publico, kico lo tabata e proximo pasonan, mirando e veredicto di hues. A duna e ministro 48 ora pa percura pa e director keda removi y manda otro lugar.
Tur esaki a keda formula tambe den un carta cu e sindicato a manda pa e empleadonan di e departamento (cu por mira banda di e articulo aki; red.). Ademas den e carta ta notifica e empleadonan cu, segun e sindicato, tanten no tin un carta di banda di e ministro concerni, e empleadonan lo no tin un obligacion pa sigui instruccion duna pa e director.
Tambe e carta ta bisa cu esnan cu ta sigui instruccion toch, sindicato lo kier sinta cu nan “pa wak kico ta nan motibo y opinion pa cu esaki tabata, mirando cu sigur nos lo kier wak nan punto di bista, vooral den cuadro di e despedida di sr. Staring cu lo tuma lugar pronto.”
Den e rueda di prensa a expresa tambe un acusacion contra e director, den e sentido cu e lo a usa e titulo di ‘doctorandus’ (drs) sin cu e tine. Den e rueda di prensa mes, riba pregunta di prensa, e sindicalista a referi na e ministro encarga pa loke ta e investigacion al caso.
Despues di practicamente un siman, ainda no tabatin un instruccion di e ministro concerni encuanto e regreso di e director; di otro banda no tabatin obstruccion tampoco pa e director reanuda trabao. Kico mientras tanto ta e posicion di e management team? Palabra ta na e ministro.
