Diamars mainta a tuma luga un manifestacion pasivo dilanti Parlamento di Aruba na unda Sindicato TOPA (Trahadonan Organisa di Sector Publico di Aruba) a haci entrega di un manifiesto y rapport ariba e tema di Prestatiemanagement Sisteem. Reporta di Bon Dia Aruba a acerca presidente di sindicato TOPA pa un declaracion.
Sr. Tromp a splica cu e meta di e manifestacion pasivo aki tabata pa entrega e documento cu TOPA a traha riba dje pa asina pone Prome Minister, Evelyn Wever-Croes, na haltura di e trabao cu a wordo haci pa gobierno tuma un decision.
E sindicato a tuma e decision pa sigui cu e paso aki pa motibo cu e comision tecnico no a duna nan un contesta satisfactorio ariba e documentonan cu nan a presenta. “A haci entrega di e documento pa asina gobierno por mira e investigacion cu TOPA a haci cual ta local y tambe ariba cosnan cu a tuma luga na Hulanda na unda bo ta saca loke ta valido pa Aruba y tuma nan como ehempel,” Tromp a remarca.
Pa loke ta trata e puntonan di prioridad den e documento extenso cu nan a entrega, el a indica cu nan no ta bay discuti esaki ainda. E sindicato ta bay warda ariba e contesta di gobierno prome y despues nan lo elabora ariba e documento y e puntonan di prioridad.
Sindicato TOPA ta e unico sindicato cu a keda na mesa pa dialogo cu gobierno ariba e tema di Prestatiemanagement Sisteem y pa e mesun motibo ey, sindicato TOPA so a yama e manifestacion aki.
Sr. Tromp a recorda cu algun luna atras e otro sindicatonan a bandona mesa di negociacion y TOPA so a keda na mesa y a presenta e puntonan cu nan ta kere cu mester wordo cambia den prestatiemanagement.
“E sindicatonan a eigenlijk laga nos un banda, nan a bay den prensa critica nos pisa, kiermen nos no ta mira motibo pa acerca nan riba e punto ey pasobra nos sa nan punto di bista caba,” el a resalta.
Sindicato TOPA a duna gobierno for di dia 10 te cu dia 13 di october, teniendo na cuenta e siman di vakantie, pa reacciona ariba nan documento y pa nan informa con leu nan ta pa loke ta trata e Prestatiemanagement Sisteem y e cambionan cu e sindicato ta desea di mira den e ley aki.
