(NLTimes) – Sindicato di docentenan AOb y e conseho pa educacion secundario VO-Raad kier reduci e standard di orario escolar pa studiantenan den educacion secundario. E docentenan ta pasa demasiado tempo dilanti klas, y esaki ta solamente aumentando pa causa di e escasez den maestronan. “Esaki ta un peliger grandi cu nan lo agota y retira di educacion,” AOb su president Tamar van Gelder a bisa na NOS.
Scolnan na Hulanda ta obliga di provee studiantenan cu un set di ora di educacion. Pa VWO esaki ta 5,700 ora durante henter e periodo escolar, pa HAVO esaki ta 4,700 ora y pa VMBO esaki ta 3,700 ora.
Scolnan ta haciendo tur nan esfuerso pa cumpli cu esaki den medio di e escasez di docente. Esaki ta nifica cu e docentenan existente ta traha cada biaha mas y mas duro, purando cu lesnan y coriendo riesgo cu nan lo retira, AOb y VO-Raad a comenta na NOS.
“Docentenan mester ricibi mas tempo pa preparacion pa e lesnan, desaroyo y profesionalisacion. Awo nan tin solamente un ora y mey pa prepara, papia cu un studiante y controla trabao,” Van der Gelder a bisa.
Henk Hagoort di VO-Raad a agrega “si e presion disminui, e satisfaccion cu e trabao lo aumenta. E ta esencial pa mantene e docentenan.” El a agrega cu e cantidad di oranan dunando les obligatorio na Hulanda ta considerablemente mas halto cu otro paisnan Europeo.
Segun e organisacionnan, reduci e oranan obligatorio di educacion no lo baha e calidad di educacion. “Un docente cu un trabao full time actualmente ta duna 25 ora di les pa siman. Pensa riba 20 ora di les pa siman, pa asina bo tin mas tempo pa prepara. Lesnan lo tuma luga di manera menos basico y bira miho.” “Mester tin tempo pa esaki. Si e cantidad di trabao disminui, e calidad ta aumenta. Esaki ta bon pa e studiantenan.”
Segun AOb, “e ta miho pa tin un ora di les for di un docente cu licencia ken tabatin tempo pa prepara compara cu 2 ora di un docente cu no ta cualifica.”
Minister Dennis Wiersma pa Educacion Primario y Secundario a conta NOS cu scolnan ya caba tabatin hopi libertad pa dicidi con pa yena e tempo. “E no mester ta den klas. Tambe e por ta un momento di estudio independiente, haciendo un presentacion of haciendo algo otro. Tin mas opcion pa yena e tempo, haci uso di esaki.”
Wiersma ta pensa cu reduci e standard di oranan ta bay mucho leu. “Mi ta kere cu tin un riesgo den calidad,” el a expresa. “Bon lesamento, matematica, skirbimento y con pa interactua den Hulandes. E habilidadnan den e materianan aki a disminui den añanan recien. Si nos manda muchanan menos na scol, e habilidadnan aki lo bira pio. Mi no tin un bon sentimento pa cu esaki.”
E inspectorado di Educacion a agrega cu e standard di orario no ta aplica di manera estricto na scolnan. E Inspectorado ta interveni solamente ora tin señal cu e calidad di e educacion ta den peliger.
