Presidente di sindicato STA, sr. Diego de Cuba ta haya cu tin hopi cos riba tereno di proteccion di e trahadonan cu mester wordo drecha. Un di nan ta e dianan liber specifico cu pago ora pa ehempel un trahado ta atende un matrimonio, entiero di un familiar, etc…
E no ta haya cu solamente e parti financiero ta conta rond di e negociacion di un contracto colectivo (CAO), sino e parti social, orario di trabou, etc…
“Nos a bisa semper cu nos di sindicato STA ta boga pa 40 ora pa siman”, el a bisa. E ta haya cu 40 ora pa siman ta duna e empleado espacio pa e por disfruta cu su famia, pues e parti social di bida cu ta un aspecto masha importante pa cualkier ser humano.
E ta declara cu si un hende ta traha 6 dia pa siman e no ta resta nada, pasobra un dia so cu ta resta bo den henter un siman, ta limita pa haci un par di cos entre nan actividad di cas of domestico. “E dia ta bay y bo no tin bida social”, el a bisa.
E aspecto aki ta wordo refleha tambe –segun e sindicalista di STA- riba e cantidad di problema social cu actualmente nos tin na Aruba. Pasobra e mayornan di e muchanan a wordo totalmente absorbe pa nan trabou, ya cu di otro banda placa no ta yega y nan tin cu traha overtime.
Esaki ta trece cun’e cu “e muchanan ta pa nan cuenta of dudu tin cu wak pa e yiunan cu e consecuencia cu e ta bin cun’e”, asina cu hopi preocupacion sr. de Cuba a trece dilanti.
E ta haya cu esaki ta aspectonan, principalmente e parti social, cu nos ta perde fei bista, sin tene na cuenta cu e ta un pida masha importante mes pa bo por educa bo yiunan. “Pero si bo ta hunto cu nan con bo por educa nan!”, segun sindicalista di STA, sr. Diego de Cuba.
