Sindicato STA ta denuncia directornan di APFA ta haya prestamo di hipoteca cu interes preferencial

A pesar cu e cuenta anual ta un rapport diki riba un material complica, directiva di sindicato STA a dicidi analisa cu ayudo di expertonan e cuenta anual 2018 di e fondo di pensioen maneha pa APFA.

E analisis di e contenido a produci reaccion di parti di e sindicato aki, caminda nan a yega di expresa nan preocupacion, pero tambe e malcontento di e miembronan, specialmente for di esunnan mas critico, ariba e manera cu e fondo aki ta wordo administra.

Hipoteca y interes preferencial.
STA por a tuma nota cu APFA a publica cu advertorial dia 7 di october, caminda nan ta señala cu e comunicado cu e sindicato a publica di e miembronan preocupa, ta incorecto y incompleto.

Sinembargo directiva di STA ta haya cu APFA no ta splica kico exactamente ta incorecto of incompleto. Tampoco –segun e sindicato– APFA no ta trece prueba pa sostene nan ponencianan. Ademas STA kier mustra APFA cu e informacion cu nan ta divulga ta procedente di e cuenta anual di APFA mes.

Un punto cu STA ta considera no husto ta dicon e directornan ta haya prestamo pa hipoteca cu un interes preferencial, y mas abou compara cu e miembronan. Mientras cu e miembronan cu ta participa den e fondo, y cu ta pone placa den e fondo, tin cu paga 6%.

E sindicato a laga sa cu loke nan ta trece dilanti ta absolutamente berdad. Si bo bay na e website di APFA y bo kies ‘over APFA’ y despues bay ‘jaarverslagen’ ta haya e cuenta anual di aña 2006 te 2018. Den esun di 2018 na pagina 54 bo por lesa cu e interes cu e directornan ta haya a wordo reduci di 4% pa 3.25% .

STA ta trece dilanti cu mester corda cu APFA ta un ‘ondernemingspensioenfonds’ caminda ta dunando prestamo hipotecario na miembronan cu tin nan capital y cu ta spaar pa nan pensioen. De facto, e miembronan ta fia nan propio placa. E capital cu APFA ta maneha ta e capital di e miembronan.

E sindicato ta haya cu aki ta e caminda cu e miembronan cu no ta empleado ta wordo trata inferior. Nan ta haya cu ta bon pa APFA tuma nota di e principionan di ‘good governance.’ STA ta pone como ehempel Hulanda pa cu e fondonan di pensioen. Un di e principio basico na Hulanda ta, cu e condicionnan laboral di e empleadonan di e fondo, no mag crece mas lihe cu di e miembronan. Pa motibo si e crece mas lihe, bo por haya a termino largo cu e entrada di prima no ta bay ta suficiente mas pa carga tur e gastonan di maneho di e fondo di pensioen.

Igualmente STA a indica cu si bo bay na kadaster cu ta un registro publico, y pidi pa ‘B register deel/nummer 1117/4’ bo por lesa cu un di e directornan di APFA a fia 1,4 miyon florin. Na pagina 58 di e cuenta anual 2018 bo por lesa tambe cu un director a fia 60 mil florin, pero e porcentahe di e prestamo no ta wordo menciona. Siendo cu International Financial Reporting Standards (IFRS) ta stipula pa menciona e porcentahe. Mescos cu pa e prestamo di hipoteca.

Desigualdad.
Den su analisis riba e cuenta anual di APFA, sindicato STA por a mira un desigualdad. Ya cu e salarionan di esunnan cu ta traha den e fondo di pensioen aki a subi substancialmente cu casi 14%, esaki conforme e cifranan di e cuenta anual.

Mientras cu e miembronan cu ta hinca placa den e fondo, locual nan ta haya no a subi ni un 3%. A base di nan analisis di e cuenta anual 2018 di APFA, sindicato STA ta trece dilanti cu riba pagina 65 por nota cu na 2017 e tres directornan a costa e fondo di pensioen aki, 1.4 miyon.

Na 2018 a costa 1.2 miyon hunto. Pero pa dos aña y un kwartaal tabatin tres director y pa e otro tres kwartaal, tabatin dos director so. Ora dividi e suma aki y saca un promedio pa director pa aña, y dividi pa 13 luna, kiermen 12 luna y 1 luna di vakantie uitkering, ta yega na un cifra promedio pa director di 35.897 den 2017 y 41.025 den 2018 pa luna.

STA ta haya cu mester kita e desigualdad existente den APFA. E 100% di cobertura cu –segun e sindicato– APFA ta ‘broma’ cune, ta bon pa recorda cu esaki a bira realidad a base di sacrificio di tur dunadonan di trabou, hunto cu pais Aruba.

Na 2015 a wordo haci extra deposito pa un tota di 190 miyon florin. Tambe tabatin sacrificio di e miembronan cu awor mester traha te 65 aña pagando 5 aña mas largo nan prima di pensioen. Y tambe hayando un pensioen di e NPR-14 regeling cu ta inferior na e pension di PVL.

E sindicato ta considera cu danki na e sacrificio di e miembronan aki cu e fondo a wordo salba. Mientras cu awor e miembronan mester para mira con e directornan den e mesun aña cu APFA a perde 21 miyon florin, ta paga solamente 3,25% di interes ariba nan prestamo, y nan ta haya un aumento di 14% di salario, segun STA.

STA a trece dilanti cu den e acuerdo bilateral di 2014 entre minister Angel Bermudez y e sindicatonan, a wordo lanta comisionnan cu mester a bay atende e ‘governance’ di APFA y tambe e condicion con APFA ta duna prestamo hipotecario na su miembronan. STA ta haya cu te dia di awe nunca a sali cla kico tabata e resultado di e comisionnan aki. E sindicato ta haya cu awor mester bin cu pasonan necesario pa investiga y kita e desigualdad den e maneho di APFA.

Pues esaki ta puntonan cu pa STA ta pone e miembronan di APFA pensa, si e hendenan aki ta manehando e fondo manera debe ser. Y si mester bin un cambio den e maneho di e fondo di pensioen di APFA.