Sindicato STA ta anuncia paro completo na Arubus

Diego de Cuba di Sindicato di Trahadonan Arubano (STA) ta confirma na Bon Dia Aruba un accion di paro completo na Arubus cumisando awe 4’or di mardruga.

“No ta bay tin ningun bus ta core, pues un paro completo ta bay tin na Arubus,” sr. de Cuba ta comenta. E problema na Arubus ta cu mayoria di e busnan ta den un situacion deplorabel segun sr. de Cuba ta informa.  Di e 15 busnan nobo cu a bestel y haya na 2013, un total di 13 bus ta daña. E busnan aki ta para pues nan no ta coriendo riba caminda anto e otro dosnan cu ta coriendo ta den mal estado tambe. “Bo por imagina bo mes di un flota di 34 bus cu ta riba caminda, mas cu mita di nan ta den un estado deplorabel, ya bo sa cuantor tin.” Sr. de Cuba ta sigui bisa cu no ta responsabel pa laga chauffeurnan sali cu busnan den mal estado cu ta transportando studiante, hende di edad y publico en general.

No ta prome biaha
Sindicato STA ta enfatisa cu tanten no bin un solucion berdadero pa e busnan aki, nan lo para trabou. No ta prome biaha cu mester atende cu asunto di busnan den mal estado cu Arubus. “Tin varios otro rason tambe pa locual ta e schalering di e salarionan cu no ta atendi debidamente. Nos a compronde cu gerencia di Arubus  – aparentemente hendenan den posicion halto – a haya un aumento barbaro di casi 2.000 florin. E cosnan aki ta masha dudoso y si ta berdad e ta di condena,” sr. de Cuba ta comenta. Tin hopi otro cosnan tambe segun sr. de Cuba y pa e motibo ey tambe  manda solicita reunion cu minister Mike de Meza pa atende e situacion aki. Bon Dia Aruba mes a purba di comunica cu Arubus ultimamente desde algun siman pasa en cuanto ta e tema aki di condicion di busnan pero no a logra haya un reaccion.