Ayera tardi a tuma luga e referendum pa e trahadonan di departamento di operacion di e compania ASTEC cu ta atende cu carga na waf di Barcadera. STA a bira e sindicato cu lo representa e mayoria di e trahadonan di waf cu pa 57 aña sindicato Union Portuario Arubano (UPA) a representa. Tanto gerencia di Astec, como representante di STA y UPA tabata presente den e referendum aki.

Na final di e referendum, Mediador di Gobierno Anselmo Pontilius a declara na Bon Dia Aruba cu en bes di 42 trahado, un total di 40 trahado por haci uzo di nan derecho di voto y na final un total di 38 trahado a bay vota. E resultado tabata cla: 30 a vota pa sindicato STA y 8 a vota pa sindicato UPA. Esey ta nifica di e 40 trahadonan, e sindicato cu ta saca e mita plus uno kiermen 21 voto of mas, tin e derecho legal pa representa e trahadonan. Esaki nifica cu  proximo contracto colectivo (CAO) lo mester wordo negocia entre sindicato STA na nomber di nan miembronan y ASTEC.

Tin un CAO existente pa añanan largo cu e compania ASTEC ta uza pero awo despues di e resultado di e referendum aki, ta tarea di sindicato STA hunto cu e dunado di  trabou pa bay mesa y mira con nan ta bay atende cu e CAO.

STA
E lider di STA, Diego de Cuba ta haya cu hopi hende a vota; alrededor di un 98% di e trahadonan cu por vota a haci uzo di e derecho aki y mayoria a haci’e pa STA.

“Esaki ta un muestra caba cu mayoria di e trahadonan kier mira un cambio”, el a bisa. Esaki tabata e di dos biaha cu STA ta pidi referendum pa trahadonan di ASTEC. E prome no tabata posibel, ya cu Mediador di Gobierno na ultimo momento a haya dos carta di retiro di trahadonan, y el a suspende e referendum. “Pero aworaki si e trahadonan a bin por la goma”, el a bisa. Sr. de Cuba ta kere cu e trahadonan a bin dicidido mirando loke ta biniendo ta contra nan mes. “Nos ta compronde di e propio trahado cu a splica nos di un intimidacion di marca mayor”, el a bisa.

E veterano sindicalista a denuncia cu e trahadonan cu a afilia na STA a wordo persigui  te hasta pone nan ariba suspension pa un investigacion innecesario. “Mi ta bisa: Unda democracia di nos pais ta kedando”. E ta haya cu e situacion aki ta espantoso, y p’esey e trahadonan a bisa: Ta basta!

UPA
Presidente di UPA, Dave Franken a bisa cu nan tabata spera cu algo asina lo por a sosode. El a laga sa cu despues di october cu nan a logra gana e confiansa di e miembronan, e situacion a bolter. E ta lamenta si cu e trahadonan no a vota na fabor di UPA, ya cu e ta argumenta cu nan miembronan tin un di e miho CAO cu tin na Aruba durante e ultimo 6 aña. “Nos ta respeta nan decision pero nos ta keda cu e dilema cu gana referendum ta un cos, practica loke bo ta priminti, esey ta otro.”