Un negociacion di CAO cu ainda nan ta pega cune ta esun di ATA. Presidente di STA, Diego de Cuba, a bisa cu nan sindicato ta desapunta ‘mahos’ cu e actitud di gerencia di ATA. Nan ta haya cu a pesar cu nan a pidi intermediacion di Mediador di Gobierno, gerencia di ATA constantemente ta pone obstaculonan pa por keda cla cu e contracto colectivo (CAO).
E sindicato ta lamenta esaki y te hasta nan a pone na conocemento di e mandatario di Turismo, cu ATA tin ‘un par di miyon pa regala abogadonan y pa duna nan conseho y pa negosha cu nan na mesa, pero nan no tin niun miyon pa duna nan trahadonan.’
STA a yega di reuni cu Minister y -segun el a compronde- e mandatario a manda ATA un carta pidiendo informacionnan tocante salario di nan empleadonan. “Pero mi ta compronde cu ATA ta terco pa entrega e informacion”, el a bisa. De Cuba ta kere cu como Minister y como miembro di Hunta Directiva, e por exigi informacion na cualkier momento. Aunke e ta un compania SG, toch e ta keda un compania di gobierno.
Igualmente pa atende e asunto aki, STA ta atendiendo cu Mediador di Gobierno na mesa riba e CAO aki. El a trece e ehempel di e CAO cu recientemente nan a firma cu ANSA. Segun e sindicalista: “Caminda tin espacio bo tin cu duna.” E ta haya cu nan tin cu compronde cu e trahadonan ta curason di e compania y no ta nada mas productivo cu un trahado contento.
