Ayera mainta mayoria di trahadonan di Elmar representa pa sindicato STA a tene un accion pa expresa nan malcontento cu e gerencia di e compania estatal.

E situacion aki tin varios dia andando y lider di STA, Diego de Cuba a cualifica e accion aki como un conclusion di e reunion cu no a bay den bon ambiente, entre nan y gerencia di Elmar den presencia di mediador di gobierno.

Un factor di malcontento tin di haber cu e ultimo contracto colectivo (CAO) cu sindicato UEA (Union Electricista Arubano) a firma  y cu ta vigente te cu aña 2020.  Segun STA e CAO aki tin un articulo cu practicamente ta condena tur trahado di Elmar den un posibel reorganisacion di e compania aki. E ta haya cu esaki ta e esencia pa kico e trahadonan di Elmar a eligi STA pa representa nan.

Tambe el a tilda director di Elmar como arogante, ya cu a pesar cu e sindicato a manda varios carta pa reconoce nan delegadonan, el a ignora nan solicitud. El a bisa cu den e reunion cerca mediador di gobierno, sindicato STA tabata dispuesto pa firma un protocol, pero Robert Henriquez, kende ta director di Elmar,  a nenga di firma e protocol y despues a suspende e tres delegadonan pa dos dia sin pago.

Esaki logicamente e causa segun STA un mal contento grandi bou e trahadonan di Elmar cu a desemboca den e accion aki, segun sr. De Cuba.

“Mi tin cu bisa cu of sin STA nan a bay accion toch.” Sr. de Cuba a laga sa cu mas bien STA  bay trankilisa e trahadonan ayera mainta. Ademas nan a bin cu e iniciativa pa colecta firma pa exigi cu sr. Henriquez lo wordo kita di su funcion, ya cu e ta haya cu di e forma aki director di Elmar no por trata cu e trahadonan.

Mediador di gobierno
Mediador di gobierno, Anselmo Pontilius no ta haya realistico e echo cu sindicato STA a inicia cu un accion di firma pa pidi e cabes di e director di Elmar. El a expresa esaki despues di atende un reunion  di consulta cerca gobernador di Aruba en conexion cu e formacion di un gobierno nobo.

Aunke e ta haya tur hende por expresa nan opinion, pero den un empresa manera Elmar ta e hunta di comisario ta esun cu ta dicidi pa kit’e of no. Pero den e caso aki si nan kier termina relacion di trabou di un hende, nan mester tene un base legal pa haci esey.

Igualmente e echo cu ayera mainta tabatin un accion dilanti di oficina di Elmar na Playa, ta crea un ambiente ainda mas tenso cu lo por stroba e reunion di awe pa 4or atardi cerca mediador di gobierno. Sinembargo mediador di gobierno ta  haya cu e ambiente aki no mester stroba e reunion aki.

Pa experiencia ma pasa den accion hopi biaha, y bo ta sinta na mesa pasobra finalmente na mesa bo ta haya otro, el a bisa. Pues na mesa nan tin cu sinta manera tur otro. Asina mediador di gobierno por presenta por lo menos un documento unda ta aparece e sugerencianan basico a base di su experiencia, con e partidonan tin cu traha cu otro.

Den caso  di Elmar e ta haya cu e ta un compania solido. E trahadonan a scoge pa nan derecho y pa medio di un referendum nan a eligi otro sindicato mayoritario. E dunado di trabou tin cu atende den todo caso cu dos of tres sindicato cu ta presente den e compania aki.