ORANJESTAD –Ayera e trahadonan di Arubus a dicidi di bay den accion pa mustra nan mal contento pa e situacion di e flota actual di bus cu ta hopi deteriora y mayoria di nan no tin airco, y otro puntonan cu nan kier hala atencion riba nan.
Dos dia prome di e accion aki, minister di Transporte a anuncia cu pa prome biaha a wordo introduci un plan di inversion den Arubus, y pronto lo bin cu un flota di 8 bus nobo, sinembargo e trahadonan no ta mira niun progreso riba loke nan tin varios luna reclamando riba dje.
Reclamo di e trahadonan
Presidente di STA, Sr. Diego de Cuba a trece dilanti varios punto cu tin disgusta e trahadonan di e compania di transporte publico, y cu a haci cu nan a bay den accion ayera. El a bisa cu “e trahadonan tin puntonan valido pa bay den accion”.
Den prome luga e situacionnan di e busnan ta bastante deplorabel. Pero aparte di esaki mayoria di e busnan nan airconan ta daña. El a referi cu e ultimo flota di bus cu Arubus a adkiri tabata di mal calidad tambe. E temperatura halto cu ta wordo registra den e dianan aki tambe ta haci cu e chauffeurnan di e busnan aki ta trahando den un situacion hopi inconfortabel.
Nan ta confronta e problema cu rond di nos isla nos por mira e situacion di e paradero di bus, cu nan ta den mal estado, no tin e espacio apropia pa e pasaheronan subi of baha for di e bus. Igualmente e mashin den bus mester wordo actualisa, ya cu nan no ta funciona optimalmente.
Tambe e trahadonan ta reclama cu e busnan ta hopi sushi y nan ta haya reclamo constantemente di e clientenan. Te hasta e color di e bus tambe ta un motibo di mal contento cerca e trahadonan. Sindicalista de Cuba a bisa cu nan ta reclama pa uniforme lo por cambia pa e color anterior pasobra nan ta di opinion cu e color cu nan ta uzando ta atrae e calor di solo mas hopi. “Esey mi no sa si nos lo por determina esey definitivamente”, el a bisa.
Siguridad
Otro punto di reclamo ta cu e personal na warda –segun STA ta compronde- a wordo disminui obligando e trahado core mas velocidad pa e no perde su brake cu e tin derecho riba dje, el a bisa. Nan tin problema cu vakantie y e medidanan di siguridad na e bushalte na Playa ta laga hopi di desea, asina sindicalista de Cuba a denuncia. El a bisa cu autonan ta drenta y sali ki ora cu nan kier for di parkeer y hopi di nan ta haci esaki na velocidad halto.
Igualmente nan ta haya cu tin un persona so cu ta traha na balie, ya cu e señora aki ta confronta un cantidad di hende riba dje cu dificilmente e por atende cu e fluho di clientenan cu ta haci uzo di Arubus.
E lider sindical a finalisa bisando cu ayera e empleadonan di Arubus kier a demostra su frustracion. El a ratifica cu e accion di protesta aki tabata na su luga, y sindicato STA ta para tras di e trahadonan aki.
STA a yega di manda carta pa gerencia di Arubus caba y Mediador di Gobierno y minister di Transporte tambe ta na haltura di e situacion aki. “Tur instancia envolvi ta na haltura di e situacion andando na Arubus”, sindicalista de Cuba a bisa.
