Sindicato STA a perde caso sumario contra AAA N.V.

Recientemente Sindicato Trahadornan di Aruba (STA) tabata den corte pa su caso contra Aruba Airport Authority (AAA) N.V. na unda Hues van der Leur di Corte Sumario a duna veredicto na fabor di AAA N.V.

Sr. Diego de Cuba, lider di sindicato STA a splica cu STA entama e caso contra di AAA NV pa motibo cu e compania a retira dos empleado y e retiro aki a bay en contra di e contrato colectivo entre e sindicato y e dunador di trabao.

De Cuba a expresa cu den su opinion hues van der Leur a comete un eror bastante grandi cu e sentencia aki. “Logicamente e ta un ser humano y e tambe por comete un eror, pero lesando e sentencia nos a sinti cu el a bay drumi full den scochi di AAA y no a tene cuenta cu nada di locual nos abogado a trece pa dilanti,” el a remarca.

El a indica cu aworaki STA ta bay hiba e caso na un bodemprocedure contra AAA N.V. pasobra nan no ta di acuerdo cu e sentencia. “Nos ta haya cu e sentencia aki ta completamente for di sla y e no ta na su luga,” el a bisa.

E lider di STA a indica cu aworaki nan tin cu analisa kico a pasa na AAA N.V. y kico AAA N.V. a bin cune den corte “manipulando hues, manipulando nos contrato colectivo y hues a cay den nan trampa.”

De Cuba a enfatisa cu AAA N.V. a bay completamente en contra di r contrato colectivo cu tin entre e dunador di trabao y e sindicato. El a subraya cu ley di contrato colectivo ta algo sagrado y aki cu hues, tal bes no tabata sa di dje y/of e no a tene cuenta cune.

El a splica cu den articulo 12 di e ley di contrato colectivo ta bisa cu cualkier disputa cu tin of cualkier documento cu tin cu ta bay en contra di e contrato colectivo, cual ta mara e dos partidonan cu den e caso aki ta e dunador di trabao y e sindicato, lo wordo declara nulo.

“Den e caso aki AAA N.V. a haya ta bon pa bin cu cosnan bieu dilanti den corte y usa nan como motibo pa retira dos persona opstaande voet. Kico ta pasa, e contrato colectivo ta bisa bo cu ora bo tin intencion pa castiga un hende bo tin cu mand’e un carta y den e carta mester describi kico ta e infraccionnan cu el a comete,” de Cuba a indica.