Antayera a tuma luga e referendum pa dos departamento di Seaport Casino cu a duna e representacion sindical na STA.
Mediador di gobierno, Anselmo Pontilius, a declara na Bon Dia Aruba cu un total di 29 trahado por a haci uzo di nan derecho di voto. E mayoria di nan a bay vota na oficina di mediador di gobierno. E tabata 21 trahado cu a bay vota di un total di 29. Tur 21 a vota pa sindicato STA, consecuentemente e sindicato aki a haya e mayoria.
Cu e resultado aki, mediador di gobierno a splica cu e ta spera cu tanto gerencia di e compania como e sindicato STA por sinta na mesa mas pronto posibel, entre otro particularmente pa loke ta trata condicionnan di e trabou, contracto colectivo (CAO), etc..
Den e dianan aki, oficina di mediador di gobierno lo publica e resultado di e referendum aki conforme cu ley. “Nos a cumpli cu e parti legal y formal di e ley di referendum, y aworaki ta keda na e dunado di trabou y e sindicato pa loke ta e trabou cu mester wordo haci”, asina sr. Pontilius a declara na e matutino aki.
Sindicato STA
Di su banda, Raymond Vrolijk kende ta secretario general di STA a declara na Bon Dia Aruba cu e logro sindical aki ta un desafio grandi pa STA. Esaki ta e prome biaha cu un sindicato ta drenta den Seaport Casino, despues cu esaki a wordo bendi cu un compania Mericano cu tin representacion den varios casino di diferente pais.
STA ta pendiente di e siguiente reunion pa defini e proceso di negociacion di un CAO nobo. “Nos kier pa e trahadonan su futuro progresa den e empresa aki”, e sindicalista Vrolijk a bisa.
