Ayera mainta Sindicato di Trahadonan di Aruba (STA) a ofrece un conferencia di prensa pa informa cu despues di varios aña nan a logra firma un contract colectivo (CAO) cu e obhetivo di duna un paz laboral na empleadonan di Tierra del Sol.

Den presencia di delegadonan, trahadonan y hasta e doño nobo di Tierra del Sol, ayera mainta sindicato STA a firma un contract colectivo pa empleadonan di Tierra del Sol na unda el a sigura cu esaki ta un proceso cu a tuma basta tempo.

Pero pandemia tambe a yega Aruba pa loke e situacion a bira un tiki mas dificil y esey a trece un retraso cune y lo cual cu nan ta contento awor ta ni un hende a perde trabou “mester hala faha mara durante pandemia y Tierra del Sol no tabata un compania cu tabatin e forsa financiero pa soporta e exigencianan di e sindicato, di loke e trahadonan tabata pidi,” Diego de Cuba, presidente di e sindicato a expresa.

Igualmente el a splica cu loke a pasa ta cu despues di pandemia nan a mira un recuperacion y ora nan tabata cla pa firma un contract colectivo na fin di aña pasa, a bin compronde cu e compania a wordo bendi na un grupo Spaño pero “no hay mal que por bien no venga, e contract colectivo nos lo bay firma awe pa empleadonan, ta un contract bon balansa y tin e mayoria di ingredientenan pa un bon contract colectivo,” el a sigura.

Esaki tin un duracion di tres aña pa asina mantene e paz den e añanan cu ta bin principalmente y lo cual cu nan a logra den e contract aki ta basta bon, “si nos ta haci un calculacion di tur cos hunto, e trahadonan ta bay dilanti den tres aña cu mas o menos 15% e cual ta un averahe di mas o menos 5% pa aña, si nos wak tur lo cual nan ta bay dilanti den dje, nan salario ta bay ta miho y nan ta bay dilanti den dianan liber cu pago, fondo di spaar, bonus di fin di aña, placa di vakantie, dus si nos wak tur cos hunto, esaki ta un contract colectivo basta bon,” De Cuba a señala.

Como sindicato nan sa cu por a presiona un tiki mas pero mirando e hecho cu e compania cu ta bay tuma over aworaki tin cu bay haci un inversion basta grandi pa lo cual ta e infrastructura pa e campo di golf, e area aki a deteriora den tempo cu a pasa pa falta di ekipo, di materialnan pa e trahadonan pa por haci mantencion el a bay bastante atras, manera De Cuba a sigura.

“Y nos tin comprension pa esey y nos a splica e doñonan nobo tambe cu nos tin comprension pero di otro banda, nos kier pa nan tambe mustra comprension pa e empleadonan cu a warda asina hopi y a sacrifica pa mantene tur lo cual cu nan por a mantene cu e tiki cu nan tabatin y mi tin cu bisa cu toch nan a mustra comprension y nos lo firma cu e doñonan nobo,” el a expresa.

Nan tambe ta espera cu paz laboral por reina na Tierra del Sol pa e proximo añanan cu ta bin y cu despues di esaki nan lo por firma algo mucho mas miho pa e trahadonan, “pasobra mi ta kere cu e inversionistanan, esnan cu a cumpra e compania aki no ta miyonario, nan ta biyonario kiermen ta hendenan serio, hendenan cu ya nan tin un hotel caba cu a cumpra Tierra del Sol y nan ta bay traha un otro hotel mas tambe, nan tin intencionnan hopi serio pa inverti den e pais aki, ban espera cu tur cos bay bon.” De Cuba a finalisa.

Doño nobo di Tierra del Sol

Manera a bira conoci na comienso di aña, Tierra del Sol a wordo bendi na un compania turistico yama Iberostar Group, un compania cu ta categorisa nan mes como lider den turismo responsabel, nan ta doño di mas di 100 hotel di 4 y 5 strea na 16 pais cu un cifra di 5,6 miyon cliente.

Iberostar Group ta un empresa Spaño di propiedad 100% familiar dedica na sector turistico for di mas di 60 aña caba y nan origen ta bin for di industria di sapatonan na 1877, despues na 1956 nan a drenta den sector turismo cu e compra di Viajes Iberia y nan a cuminsa crea aliansanan cu companianan di tour mas prestigioso di Europa, Merca y Canada.

Na 1983 ta nace e marca Iberostar cu 7 hotel na Mallorca, Spaña.

Na 2017 nan a lansa nan movemento pa cuida oceannan yama “Wave of Change” cu e cual nan ta pretende di contribui principalmente na e cumplimento di 14 meta di SDG’s pa asina conserva y utilisa di forma sostenibel oceannan, lama y recursonan marino pa desaroyo sostenibel, p’esey nan ta utilisa e potencial di industria turistico pa construi un modelo di turismo rendabel y responsabel pa cuida oceannan y disminui e cambio climatico.